Asllan Uka ka 12 vjet që jeton si person me nevoja të veçanta, për shkak të një plumbi qorr që i ndryshoi jetën.
Ngjarja e dhimbshme për të, ndodhi në një aheng familjar, ku Asllani ishte mysafir dhe u plagos nga një person, i cili po ashtu ishte pjesëmarrës në atë aheng.
Ai ishte 47-vjeçar kur plumbi ia dëmtoi atij unazën e katërt të boshtit kurrizor dhe prej atëherë ka mbetur i palëvizshëm.
Para vitit 2005, kur ishte plagosur, ai ka punuar me biznes dhe ndërtimtari.
“Aksidenti ka ndodhur në moshën 47-vjeçare,më 17 korrik 2005. Kjo ka ndodhur aksidentalisht, por që mua ma ka ndryshuar jetën 100 për qind. Kam mbetur në karrocë dhe jam i varur nga të tjerët. Prej kohës kur ka ndodhur aksidenti, për fat të keq unë asnjëherë nuk kam mundur të punësohem, edhe pse kam qenë i aftë për ndonjë punë’’.
“Lëndimi im si natyrë e shtyllës kurrizore, e unazës së katërt, aty ku edhe më ka rënë plumbi, nuk lejon që unë të eci dhe kam mbetur në karrocë. Mjekët e kanë bërë të pamundurën, por ky ka qenë fati im”, tregon Uka, për Radio “Evropa e Lirë”.
Ai e përshkruan momentin dhe ndjenjën kur e kuptoi se nuk do të mund të ecte më.
“
Kur unë e kam kuptuar që jam plagosur dhe e kam pa që këmbët e mia më janë mpirë, në po atë moment e kam kuptuar situatën. Në ato momente kam menduar a po shpëtoj apo po vdes. Pasi mbijetova, mbeta në këtë gjendje dhe duhet të pajtohesha me fatin e keq që më ka sjell jeta”.
Asllan Uka thotë se personi që e ka plagosur, nuk është privuar nga liria, por ka paguar një shumë të vogël parash dhe ka jetuar i lirë.
“Personi që më ka plagosur është mbajtur vetëm 24 orë në paraburgim dhe ka paguar një gjobë prej 3 mijë eurosh. Më pas është liruar. Ka jetuar i lirë, pa asnjë problem. Ai tash është i ndjerë, para dy vjetësh ka ndërruar jetë”.
“Unë kam një porosi, që në Kosovë të ketë sa më shumë ahengje, dasma, gëzime, por të festojmë me zemër dhe jo me armë. Nuk jam unë i vetmi që ka pësuar nga arma në dasma. Ka shumë të tillë. Andaj, ka rrezik që në këtë gjendje që kam mbetur unë, të mbesin edhe njerëz të tjerë’’, thotë ai.
Uka jeton afër qytetit të Vushtrrisë në fshatin e quajtur Bajskë, me bashkëshorten dhe katër fëmijët e tij, nga të cilët tashmë është i varur, pasi nga ajo kohë mbeti edhe pa punë.
Institucionet kosovare nuk kanë shifra të sakta për numrin e armëve ilegale, të cilat mund të jenë në duart e qytetarëve. /tesheshi.com/
