Bora e madhe, shiu dhe përmbytjet kanë marrë të paktën 132 jetë në Pakistan dhe Afganistan në dy javët e fundit, thanë autoritetet zyrtare nga dy vendet.
Të paktën 93 njerëz janë vrarë dhe 76 të plagosur në Pakistan, ku kërkohen një numër personash të zhdukur, ndërsa në Afganistan, 39 persona u vranë dhe 60 u plagosën ur, sipas të njëjtave burime.
Meteorologët gjithashtu njoftuan vazhdimin e stuhisë në ditët në vijim.
Kashmir i Pakistanit ka pësuar më të keqen, me 62 të vdekur dhe 53 të plagosur këto ditë, sipas një shërbimi lokal të menaxhimit të fatkeqësive.
Numri i të vdekurve u konfirmua për AFP nga Mathar Riaz Rana, kreu administrativ i Kashmirit të Pakistanit.
“Ne po përjetojmë vështirësi në operacionet e shpëtimit për shkak të rrugëve të pakalueshme. Njerëzit tanë ende po përpiqen të arrijnë në zona të largëta,” komentoi ai.
Të paktën 19 njerëz kanë humbur jetën e tyre dhe 10 raportohen të humbur vetëm në Luginën Neelum, ku bora e madhe shkaktoi një ortek, raportoi Agjensia Kombëtare e Menaxhimit të Fatkeqësive (NDMA).
Bora dhe shiu të martën vranë 31 njerëz në Baluchistan dhe plagosën 23, tha agjensia e administrimit të katastrofës së krahinës.
“Shumica e viktimave janë gra dhe fëmijë’, tha Mohamed Junus, kreu i agjencisë.
Në Afganistan, “pjesa më e madhe e dëmeve dhe viktimave është për shkak të shembjes së çative për shkak të dëborës së madhe dhe shiut” në jug dhe perëndim, i tha AFP-së, Ahmad Tamim Azimi, një zëdhënës i agjencisë shtetërore të administrimit të katastrofave në Afganistan.
Në provincën Herat, në perëndim, shtatë anëtarë të një familjeje u vranë kur u shemb mbi ta çatia e shtëpisë së tyre, tha ai.
“Më shumë se 300 shtëpi janë shkatërruar ose dëmtuar plotësisht në provincat në perëndim dhe në lindje,” shtoi Azimi. /tesheshi.com/
