Gruaja në krye të Prokurorisë së Tiranës, ka folur pak rreth “Dosjes 339”, diktuar nga një interes gazetaresk gjatë dalje për shtyp për një tjetër çështje.
“Në raport me pyetjen e bërë, do themi sot atë që kemi dalë për të thënë. Prokuroria prezanton dhe bën publike ato çështje që nuk hyjnë në rangun e sekretit hetimor dhe bëhen publike kur janë të arsyeshme dhe nuk cenojnë hetimet. Është filluar një proces hetimi dhe do të jemi në kontakt nëse ka ndonjë gjë për tu publikuar. Refuzoj që të jap përgjigje nëse ka ndonjë të hetuar në lidhje me nxjerrjen e sekretit hetimor”, citon TCH znj.
Imeraj, pyetur pikërisht nga gazetarja e këtij televizoni mbi dosjen e bujshme, e cila sërish ka trazuar poltikën.
Komentet e saj u bënë teksa në një konferencë për shtyp bëri me dije rezultatet e një operacioni anti-kontrabandë me në fokus automjetet e ardhura nga jashtë, e që ka çuar në pranga doganierë e policë.
Prokurorja e çështjes Mirela Cano, rrëfeu skemën:
“Dua të sqaroj që prokuroria e Tiranës duke marrë shkas nga autoritetet franceze dhe doganore shqiptare regjistroi procedimin për kontrabandë në ngarkim të Arben Grabovarit. Në prill të 2019 ky person duke hyrë në Qafë Botë ka përdor një pasaportë si shtetas grek, po hetohet në arrest me burg. Gjatë hetimit rezultoi se nga 2017-2019 në prill ka hyrë 53 herë me mjete tokësore me makina të ndryshme me lejim të përkohshëm me shmangie të detyrimeve 4.5 mln lekë, pasi ka futur 54 makina. Nga mjetet ka zhdoganuar vetëm 5 prej tyre.
Makinat nuk janë zhdoganuar dhe janë hedhur në qarkullim duke krijuar mundësi për ti përdorur edhe për qëllime të tjera. Në 19 raste policët kufitarë nuk kanë pasqyruar numrin e shasisë duke i bërë të paidentifkueshme duke u shënuar vetëm autoveturë. Po hetohet për identifikimin pasi makinat mund të jenë përdorur në ngjarje kriminale. Arben Grabovari ka kryer zhdoganimet në pika të ndryshme, Kapshticë, Qafë Botë dhe Tre Urat. Policët kufitarë e kanë lejuar të kalojë pa kryer procedurën përkatëse. Po hetohet për shpërdorim detyrë 10 punonjës policie, 4 janë në burg nga Qafë Bota, ndërsa 6 të tjerë janë pezulluar nga Kapshtica dhe Tre Urat. Ka edhe punonjës të tjerë të përfshirë që po hetohen”. tha ajo. /tesheshi.com/
