Qeveria i mbahet qëndrimit se protesta e opozitës ka për qëllim bllokimin e Vettingut, procesi bazë i reformës në Drejtësi. Ndërsa nga opozita thonë se kjo nuk është aspak e vërtetë. Sipas saj, protesta është një kauzë e madhe që lidhet drejtpërdrejt me garantimin e zgjedhjeve të lira. Por si qëndron e vërteta tej retorikës politike? Realisht, a pengon protesta e opozitës, më saktë bojkoti i parlamentit që e shoqëron këtë protestë, procesin e Vettingut? Gjuha juridike, por dhe ajo politike, nuk ka mundësi të jenë më te dy palët; o me njërën o me tjetrën….
“Tenda duket bukur, por anëtarët e Parlamentit janë zgjedhur për të bërë punën e tyre në Parlament”, tha sot në Tiranë eurodeputeti Knut Fleckenstein, raportuesi për Shqipërinë në Parlamentin Europian. Ajo së cilës po i frikësohen ndërkombëtarët dhe mazhoranca është bojkoti që po i bën opozita Parlamentit.
Edhe pse ky bojkot nuk është shpallur si vendim politik duket se tashmë opozita ka vendosur ta bëjë betejën e saj vetëm në shesh me protestë dhe jo në Kuvend.
Po pse ky bojkot i Kuvendit ka nisur të shqetësojë ndërkombëtarët?
Sepse kjo do të bllokonte zbatimin e reformës në Drejtësi për të cilët u dakordësuan të dyja palët në korrik të vitit që shkoi. Mungesa e deputetëve të opozitës do të bllokojë në mënyrë të plotë procesin e Vettingut, i shumëpritur nga shoqëria dhe ndërkombëtarët.
Si bllokohet Vettingu?
Janë tre institucione të rëndësishme të reformës në Drejtësi që pritet të ngrihen në javët që vijnë dhe për ngritjen e tyre duhen votat e Kuvendit; jo vetëm të shumicës, por sipas ligjit të ri- të të dyja palëve, shumicës dhe opozitës.
Bëhet fjalë për Komisionin e Pavarur të Kualifikimit, Kolegjin e Pavarur të Apelimit dhe Komisionerët Publikë, institucione që presin listat e kandidatëve të cilat po verifikohen këto ditë në zyrat e përfaqësisë së Komisionit Europian në Shqipëri nga një përfaqësi ndërkombëtare me përfaqësues të Shteteve të Bashkuara dhe Bashkimit Europian.
Opozita, sipas ligjit, ka një rol kyç në përzgjedhjen dhe votimin e 27 anëtarëve që do të përbëjenë KPK, KPA dhe komisionerët.
“Marrëveshja e 21 korrikut e bën të domosdoshme praninë dhe rolin e opozitës në ngritjen e komisioneve të vettingut. Pikërisht më duket si diçka e kalkuluar, që tashmë kur ky proces është në fazën e votimit, opozita largohet nga Kuvendi duke ditur këtë rol që ka në këtë proces”, shfaqi shqetësimin e tij ish-bashkëkryetari i komisionit që hartoi Reformën në Drejtësi, Fatmir Xhafaj duke folur në Top Story.
Roli i opozitës është sanksionuar në ligjin “Për rivlerësimin e ndërmjetëm të gjyqtarëve dhe prokurorëve”, pika kyçe e Vettingut në Drejtësi.
Brenda pak ditësh ONM (bordi i ndërkombëtarëve) do të përfundojë verifikimin e listës me 29 kandidatë që ka përzgjedhur Avokati i Popullit për institucionet e lartpërmendura. Lista do të dërgohet në Kuvend nga Avokati i Popullit, i cili në këtë rast kryen vetëm një rol administrimi të procesit, dhe Kuvendi sipas ligjit duhet të ngrejë një komision të përbashkët mazhorancë-opozitë.
Komisioni ad-hoc, që do të ketë nga 3 anëtarë nga dy palët, do të bëjë dhe verifikimin e kandidatëve dhe bën gati listën finale që do të votohen më pas në Kuvend.
Nëse opozita vijon me bojkotin e saj ky komision bëhet i pamundur të ngrihet pasi ligji nuk ka parashikuar asnjë mekanizëm në rast të mungesës së njërës palë.
Madje më tej dhe votimi në seancë plenare që kërkon 3/5 e votave bëhet i pamundur.
Me pak fjalë, procesi i Vettingut ngec në varësi të vullnetit politik të opozitës.
Kryeministri Rama e akuzoi opozitën se qëllimi i protestës së saj është pikërisht bllokimi i këtij procesi. Sipas tij, Vettingu do ta na çlironte nga “qindra krime të rënda janë krime të përsëritura nga kriminelë të arrestuar nga policia dhe të liruar në sallë nga gjyqtarë të korruptuar”.
Por opozita nuk e pranon këtë “qëllim të fshehur” të protestës së saj, pasi argumenti kryesor i protestës është “garantimi i zgjedhjeve të lira e të ndershme”.
Mbetet për t’u parë në ditët në vijim nëse opozita do të vijojë protestën, ndërkohë që përmbush premtimin e saj të dhënë në korrik për votimin e reformës në Drejtësi, duke marrë pjesë në komisionet e posaçme që do të ngrejë Kuvendi për Vettingun…/tesheshi.com/
