E bija e Berishës, “llogari para Zotit” për Gërdecin dhe 21 janarin

E bija e Berishës, Argita Malltezi, ka dhënë një përgjigje të paqartë në lidhje me dy ngjarje të rënda të cilat rëndojnë mbi të atin e saj, Gërdecin dhe 21 janarin, me gjithsej 30 jetëhumbje.

Znj. Malltezi ishte e ftuar në Top Story për të folur rreth arrestimit të bashkëshortit të saj me akuza nga SPAK, të cilin e ka avokuar dhe si juriste, por në një moment u pyet rreth se ç’qëndrim kishte ndaj atyre dy zhvillimeve tragjike gjatë qeverisjes së babait të saj.

Përgjigja ishte:

“Unë jam këtu sepse mendoj që kam një detyrim për të shpjeguar karshi atyre qytetarëve shqiptarë që kanë mbështetur Sali Berishën dhe Partinë Demokratike. Nuk jam këtu për t’i kërkuar askujt asgjë. Kjo çështje është një çështje e zhveshur totalisht nga materia, është një çështje që do të përthahet shumë shpejt, po aq në mënyrë të çuditshme sa nisi. Kështu që duke mos qenë njeri publik, nuk pritej nga unë një reagim publik për ato situata. Por të jeni të bindur që të gjitha ato situata rëndojnë. Pavarësisht fajit, që është diçka krejt tjetër, situata vetë rëndon.

Këto janë ndodhi që shoqërojnë rekursin politik dhe historik të një vendi, është fatkeqësi e madhe dhe një peshë e rëndë përballja me to. E rëndësishme është që njeriu të ketë një llogaridhënie karshi Zotit dhe ligjit. Kjo e dyta ka treguar qartë që nuk ka pasur veprim të paligjshëm nga strukturat shtetërore. Dhe e para, unë sa herë që e shikoj situatën e Gërdecit është një gjë që më dhemb zemra. Nuk është se kalohet thjesht”.

Pra, ajo që mund të veçohet nga kjo përgjigje, është fakti se znj. Malltezi njeh atë që është e ardhmja e pashmangshme e çdo njeriu, llogaridhënia para Zotit, e cila nuk krahasohet me atë para ligjit. /tesheshi.com/