Në një moment kur Ilir Meta po faktorizohet brenda qeverisjes duke i vënë kushte aleatit të rij, brenda partisë së madhe të majtë janë krijuar dy linja të ndryshme që influencojnë tek Edi Rama. Kush e përfaqëson linjën pro-Meta dhe pse?…
Aleati kryesor në qeverisje, në mënyrë hipotetike i ka lëshuar karriget e tij në qeveri opozitës duke e vënë kryeministrin Edi Rama në një pozicion të vështirë. Por, ndërsa Meta vetëm e thotë por nuk e bën atë që thotë, duke e vijuar bashkëqeverisjen ligjërisht, por dhe duke e rrëzuar publikisht, PS-ja dhe vetë Rama janë pa një qëndrim zyrtar ndaj aleatit të tyre. Ka të paktën dy linja brenda PS-së në raport me aleancën me Metën.
E para është ajo e përfaqësuar nga Gramoz Ruçi dhe Saimir Tahiri, të cilët janë hapur dhe madje nxitës të ndarjes së PS-së nga LSI në prag të zgjedhjeve të reja.
Ruçi më shumë se një herë gjatë takimeve me elektoratin socialist ka potencuar “fuqinë” e PS-së duke deklaruar se janë të gatshëm të dalin vetëm në zgjedhje. Siguria me të cilën flet Ruçi, një një nga njerëzit kyç në organizimin e kësaj partie, është dhe llogaria e votave që ai po bën prej mujash me bashkëpunëtorët e tij. Siç duket, të dhënat e elektoratit të PS-së, pa marrë parasysh peshën e votave të LSI-së në koalicion, janë të tilla që i japin nr. 2 të selisë rozë, një personazhi gati historik në PS,bindjen për t’u futur në garë vetëm.
Pak më i ashpër është Saimir Tahiri, ish-ministër i Brendshëm, i cili është sulmuar vazhdimisht nga aleatja bashkëqeverisëse dhe ka qenë një telash për drejtorët e korruptuar të LSI-së, një dyzinë prej të cilëve kanë rënë në pranga gjatë drejtimit të dikasterit nga Tahiri.
Ky i fundit, që pas lënies së postit të ministrit nuk ka nguruar t’i kundërpërgjigjet LSI-së ashpër duke i kujtuar madje dhe “frikën nga prangat” për bllokimin e Reformës në Drejtësi apo “lojën farsë”, që, nga njëra anë flirton me opozitën dhe nga ana tjetër rri në qeveri.
Ka dhe deputetë të tjerë që e shigjetojnë LSI-në dhe duket që mezi presin daljen e këtij aleati bezdisës nga koalicioni.
Po atëherë kush kërkon ta mbajë akoma Metën në bashkëqeverisje dhe që është i interesuar të ruajë klimën miqësore ndaj kësaj force, madje dhe t’i përulet deri në lutje që të qëndrojë në aleancë me PS-në?
Në krye të këtij grupi më i interesuari për këtë aleancë dhe mbrojtës i hapur i saj ndodhet Erion Veliaj, një nga njerëzit më të afërt të kryeministrit Rama dhe kryetar i Bashkisë së Tiranës. Veliaj ishte pjesë e darkës së fundit Meta-Rama, e cila si për koinçidencë u organizua tek Pazari i Ri, investimi me të cilin po mburret Veliaj së fundmi. Veliaj është drejtpërdrejt i interesuar për një mbarëvatje punësh mes PS-së e LSI-së, pasi si kryetar bashkie, atij i duhet Këshilli Bashkiak për vendimmarrje me rëndësi. Një bllokim nga ana e këshilltarëve të LSI-së do të ishte një pengesë e madhe për të dhe për projektet që ka për qytetin.
Pas Veliajt janë gjithashtu deputetët që kanë ardhur në PS nga Mjaft-i dhe G99-ta si Olta Xhaçka, etj..
Të dyja palët duket se kanë një ndikim të fortë tek Rama. Mjafton të shohësh takimet periodike që ai bën me Tahirin, Veliajn e Ruçin kohët e fundit. Ndikimi i tyre ndikon dhe në paqartësinë që Rama shfaq kur flet për aleatin e tij ku herë i tregon derën, herë e fton të rri në qeveri e herë e thumbon; po nga ana tjetër nuk është i prerë në një qëndrim për aleancën duke e lënë atë në dorën e humorit të Metës./tesheshi.com/
