“Njëri nga të dyshuarit kryesorë për të shtënat natën e kaluar në Dallas, nga të cilat mbetën të vrarë pesë policë, ka shërbyer në ushtrinë amerikane si rezervist. I dyshuari i ka thënë një negociatori për lirimin e pengjeve se ai ishte i shqetësuar për vrasjet e fundit të policisë, me ç’rast dy persona me ngjyrë kishin humbur jetën, dhe se dëshironte të vriste të bardhë, sidomos policë të bardhë,” ka njoftuar shefi i Policisë së Dallasit, David Brown, gjatë një konference për shtyp në orët e para të ditës së sotme.
I dyshuari, i cili vdiq si rezultat i një roboti bombë të shpërthyer nga policia, është identifikuar si 25-vjeçari Micah Xavier Johnson, kanë bërë me dije burime nga organet e zbatimit të ligjit.
Johnson ka shërbyer në ushtri si rezervist deri në prill të vitit 2015. Ai ishte i stërvitur, ndërsa ka punuar si zdrukthtar dhe murator i specializuar, kanë thënë zyrtarët e mbrojtjes.
Sipas Brown-it, i dyshuari “ka dashur të vrasë zyrtarë” dhe ka “shprehur zemërimin e tij për jetët e humbura të njerëzve me ngjyrë”.
“I dyshuari po ashtu ka deklaruar se nuk ishte i lidhur me asnjë grup, e se ka vepruar vetëm,” ka shtuar shefi i Policisë së Dallasit.
Pesë zyrtarë janë vrarë, kurse shtatë të tjerë janë plagosur, nga të shtënat gjatë natës së kaluar, ndërkohë që dy civilë janë raportuar të jenë plagosur. /tesheshi.com/
