Ekstradohet nga Serbia në Maqedoni gazetari më kontrovers maqedonas Zoran Bozhinovski. Pas arrestimit dje nga autoritetet e policisë serbe në orët e vona të natës, është bërë ekstradimi i tij. Lajmi është bërë i ditur nga Ministria e Punëve të Brendshme të Maqedonisë.
“Procedura është kryer mbrëmë rreth orës 21:30. Atë e ka zbatuar Ministria e Drejtësisë, ndërkaq MPB-ja është lajmëruar për procedurën”, thanë nga MPB.
Jo-zyrtarisht mësohet se Bozhinovski është dërguar në Burgun Hetues Shkup, në lagjen Shuto Orizare, ndërkaq procedura e mëtutjeshme kundër tij, është nën kompetencat e Ministrisë së Drejtësisë.
Në bazë të fletarrestimit ndërkombëtar që është ngritur kundër tij në vitin 2013, Bozhinovski është i dyshuar në rastin “Spiuni”.
Rasti “Spiuni” në Maqedoni u përmbyll me mbi 70 vjet burgim për 18 të akuzuarit. Dënim më të lartë prej 15 vjet heqje lirie e mori Marjan Efremov, nën akuzën se ka spiunuar për shërbimet e huaja sekrete, ndërkohë që është marrë edhe me shantazhe dhe mitmarrje.
Sipas akuzës, grupi i spiunazhit i përbërë nga 18 persona ishte formuar në vitin 2009 dhe ka funksionuar deri në vitin 2012, duke u pasuruar përmes shitjes së informacioneve, shërbimeve sekrete greke dhe hungareze.
Zoran Bozhinovsi ndodhej në arrati më shumë se 3 vite në qytetin Novi Sad të Serbisë, dhe nga atje, përveç tjerash është bërë i njohur edhe për publikimin e bisedave nga përgjimet e funksionarëve të lartë politik në Maqedoni. Mes tyre së fundmi ka publikuar edhe audionçizimet e dy bashkëpartiakëve të partisë shqiptare në pushtet BDI-së, atë të ish zëvendëskryeministrit për Implementimin e Marrëveshjes së Ohrit, Musa Xhaferi dhe deputetes Ermira Mehmeti. Biseda e tyre erotike ishte shkas që kryetari i BDI-së, Ali Ahmeti të largojë nga posti i tij Musa Xhaferin dhe shumë të tjerë.
Arrestimit dhe ekstradimit të Bozhinovskit sipas opinionit të gjerë në Maqedoni iu janë gëzuar më së shumti përfaqësuesit politik në pushtet. Në rrjetet sociale kishte statuse të shumta ku thuhej “tashmë më lehtë do marrin frymë VMRO-së dhe BDI-së, sepse nuk ka kush t’ua publikoj marrëzitë”,
Tani në rrjetet sociale kanë filluar të tallen me përfaqësuesit politik të BDI-së dhe VMRO-së./tesheshi.com/
