Prokuroria Speciale e Kosovës do të duhet që së shpejti të urdhërojë fillimin e gjurmimeve brenda kampusit të Universitetit të Prishtinës, afër kishës së kontestuar ortodokse.
Mjeku ligjor Arsim Gërxhaliu ka thënë në një intervistë për emisionin “Personale” të TV Dukagjinit, se kanë pranuar një dëshmi serioze nga një qytetare, e cila pretendon se ka parë që gjatë luftës të jetë groposur persona në atë pjesë.
“Jo shumë ditë më herët kam marrë një thirrje nga një grua, të cilën do ta takoj javën e ardhshme. Ajo thotë se ka parë që në afërsi të kishës se kanë varrosur njerëz. Do të na i tregojë vendin se ku dyshohet dhe ne do të kontrollojmë”, ka thënë Gërxhaliu, transmeton Telegrafi.
Njeriu që për 17 vjet është përgjegjësi kryesor për gjetjen e të zhdukurve nga lufta e fundit në Kosovë, për herë të parë ka rrëfyer ekskluzivisht për këtë emision se dy ditë pas hyrjes së trupave të KFOR-it kanë ekzaminuar bodrumin e Fakultetit Juridik, ku në afërsi të këtij lokacioni dyshohej se ishin dhunuar femra nga forcat ushtarake serbe.
“I gjithë bodrumi ka qenë me gjak dhe më veshje të brendshme të femrave”, ka treguar Gerxhaliu.
Mijëra civilë shqiptarë janë vrarë gjatë luftës së fundit në përpjekje të ish-diktatorit serb Millosheviq që të zbatonte planin “Patkoi” për zhvendosjen e popullatës shumicë shqiptare nga Kosova.
Civilët e vrarë ishin hedhur nëpër varreza masive në Kosovë, ndërsa në përpjekje për të humbur gjurmë,t disa ishin dërguar edhe në Serbi. Ende janë mijëra të pagjetur.
Kisha ortodokse në kampusin e Universitetit të Prishtinës është ndërtuar nga diktatura e Millosheviqit në shenj dominance ndaj shumicës shqiptare. /tesheshi.com
