Gjykata e Vlorës vendosi sekuestrimin e një shume prej 531 mijë USD me dyshimin e pastrimit të parave.
Vendimi është marrë pas hetimeve në kuadër të luftës kundër krimit të organizuar si dhe sekuestrimit të pasurisë që rrjedh nga veprimtaria kriminale.
Prokuroria njofton se është hapur proçedimi penal i regjistruar për “Pastrimi i produkteve të veprës penale ose veprimtarisë kriminale”, parashikuar nga neni 287 i Kodit Penal për hetime të pasurisë së shtetasit A.I.A.
“Si rezultat i vijimeve të veprimeve të kryera, nga Sektori për hetimin e krimit ekonomik- financiar pranë Drejtorisë Vendore të Policisë Vlorë, në bashkëpunim me Prokurorinë e Rrethit Gjyqësor Vlorë, është bërë ekzekutimi i vendimit të Gjykatës së Rrethit Gjyqësor Vlorë.
Vendimi mban daten 09.08.2017 dhe pas tij erdhi masa e sigurimit pasuror, sekuestro preventive mbi llogaritë bankarë të shtetasit A.I.A në një bankë të nivelit të dytë për shumën 531.031 USD”, thuhet në një njoftim zyrtar. /tesheshi.com/
