Prokuroria e Kosovës ka marrë të gjitha masat për të hetuar dyshimet se në parkingun e Fakultetit të Arteve gjendet një varrezë masive e shqiptarëve të vrarë gjatë luftës.
Për shkak të këtyre dyshimeve, në njërën pjesë të kampusit të Universitetit të Prishtinës do të fillojnë gërmimet e reja. Aktualisht, policia ka bllokuar hyrjet e Universitetit, dhe po zhvillon hetime me ndihmën e ekspertëve të forenzikës.
Drejtori i Institutit të Mjekësisë Ligjore, Arsim Gërxhaliu, ka treguar se dëshmitarët kanë pohuar se në atë pjesë ka pasur lëvizje me ekskavatorë në kohën e luftës, dhe se gërmimet e rrafshimet janë bërë gjatë natës, njofton Kosovapress.
Gërmimet janë me urdhër të prokurores Drita Hajdari, dhe pasohet nga punimet që janë bërë në një lokacion të afërt tri vite më parë. /tesheshi.com/
