Për herë të parë në kuadër të vrasjeve të 21 janarit, botuesi Italian Carlo Bolino ka rrëzuar mitin e gazetarit Artan Hoxha në nxjerrjen e kasetës që ktheu përmbys gjithçka në lidhje me vartetësinë e plumbave nga Garda, gjë që rrëzoi versionin e Berishës për vrasje komplotiste nga qeveria, me plumba nga brenda turmës.
Në një rrëfim të tij në A1 Report, Bolino ia atribuon vetes meritën e nxjerrjes së kasetës me pamje të qarta të vrasjeve nga Garda, duke lënë të kuptuar se ekziston dhe një dyshim në lidhje posedimin e kasetës nga ana e gazetarit Hoxha, i cili e “mbante në xhep”.
“Unë isha në Itali, në Bari se isha drejtues i gazetës La Gazzetta del Mezzogiorno, bashkë me Albën, që është bashkëshortja ime që është gazetare e që punonte duke ndjekur aktivitetet e Tiranës, si ka bërë gjithmonë. Duke parë dhe riparë këto pamje te Klanit kemi thënë që këto janë pamje të prera, pra nga pamjet mungonte diçka.
Alba ka komunikuar me redaktoren e turnit në News 24, ishte Eriselda, mos gaboj dhe i ka kërkuar të shikonim gjithë pamjet që kemi regjistruar, sepse dyshuam se duhet të kishim pamje me plan më të madh te regjistruar gjatë live.
Si funksionon transmetimi live?
Ne kishim dy kamera, të dyja ishin lidhur me regjinë, dhe të dyja transmetonin në mënyrë alternative pamje nga plane të ndryshme, por të gjithë kamerat kanë brenda një memory card (karta e memorjes) ose kaseta, pra kamera regjistron pavarësisht transmetimit. Në fakt në plane të regjistrura gjatë live nuk kishim të qartë momentin kur Garda qëllonte, sepse regjia rastësisht kishte ndryshuar pozicion.
Në atë moment na ka ardhur në ndihmë regjisori, që na tha që ne kemi edhe kaseta të kamerës qe mund të ketë dhe pamje të tjera.
Po kush e ka? Ky ishte misteri i parë.
Kaseta ishte marrë nga kameramani i televizionit dhe ishte futur në xhep të një gazetari që në vend që ta sillte në redaksi për ta transmetuar urgjent siç ishte detyra e tij, e kishte futur në xhep duke mos komunikuar fare as me drejtuesit as me redaktorët: ose nuk e dinte se çfarë kishte regjistruar, se mund të ndodhë shpesh që kameramanët e lënë ndezur kamerën dhe pastaj rrinë edhe larg nga kamera, dhe ndoshta edhe gazetari nuk e kishte marrë vesh. Ose ndoshta… unë nuk e di, nuk dua të dyshoj, megjithatë këto pamje kaq të rëndësishme nuk ishin në dispozicion të redaksisë ku duhet të ndodheshin, por ishin në xhep të një gazetari.
Kemi kërkuar ku ndodhet gazetari dhe kameramani; kështu kemi gjetur kaseta, e kemi parë dhe kemi zbuluar më në fund që ne kasetë që ishte harruar brenda një xhepi të një gazetari kishte pamje tronditëse, ato pamje të plota që tregonin tamam ngjarjen”, shpjegoi Bolino.
Më tej, ai ushqen dyshime në lidhje me integritetin e Hoxhës dhe nga fakti se pas shitjes së News 24, atë e larguan nga drejtimi i televizionit, ndërsa Hoxhën jo.
“Me këtë video unë i kam prishur punë; plani i Berishës u shkatërrua nga vendimi për të transmetuar këtë video. Nuk e di ne sa ka ndonjë lidhje apo jo, por çuditërisht pas rreth një muaji kanë filluar negociata të forta për të blerë News24. I gjithë operacioni financiar po kryhej nga një bankë në atë kohë shumë afër PD-së dhe familjes Berisha.
Unë nuk isha pronar dhe nuk kishte asnjë mundësi për ta ndaluar operacionin, por ne datë 11 maj 2011, pra vetëm 4 muaj pas transmetimit të asaj video, News 24, ka kaluar në dorë të një botuesi tjetër. Unë dhe Alba, u larguam nga TV, ndërsa ai gazetari ka vijuar të punojë në këtë TV me pronar të ri”, tha Bolino. /tesheshi.com/
