Italia, Greqia, Malta dhe Qiproja kanë dënuar sistemin e menaxhimit të migracionit në Bashkimin Evropian, sipas të cilit mbajnë një barrë joproporcionale dhe kërkojnë ndihmë nga Komisioni Evropian.
Këto katër vende “janë toka e parë e BE-së ku ata hyjnë… dhe ata duhet të mbajnë barrën më të rëndë të fluksit të emigrantëve në Mesdhe, në përputhje me detyrimet ndërkombëtare dhe rregulloret e BE”, sipas ministrave të brendshme të Italisë, Maltës, Qipros dhe ministrit grek të Migracionit në një deklaratë të përbashkët të publikuar në Romë, raporton AFP.
Ata kujtojnë angazhimin e BE-së nga qershori në Luksemburg për futjen e një “mekanizmi solidariteti vullnetar”, i cili duhet të mundësojë transferimin dhe zhvendosjen e 10,000 njerëzve çdo vit në vendet e tjera anëtare të BE-së nga vendet ku kanë hyrë.
Rezultati i zbatimit të atij angazhimi është “zhgënjyes”, sipas katër vendeve mesdhetare
“Mekanizmi është i ngadalshëm”, pohojnë ata.
Mosmarrëveshje mes Italisë dhe Francës
Këto katër vende, të cilat për shkak të pozicionit të tyre gjeografik, janë të parat që goditen nga fluksi i emigrantëve, prej vitesh kërkojnë vendosjen e një sistemi të detyrueshëm të zhvendosjes së emigrantëve.
Në pritje të një marrëveshjeje të re për menaxhimin e migracionit, “e cila do të ishte efikase, e drejtë dhe e qëndrueshme“, katër ministrat bëjnë thirrje për një “diskutim urgjent dhe të nevojshëm se si të koordinohen më mirë operacionet e shpëtimit në Mesdhe” në mënyrë që anijet e OJQ-ve që shpëtojnë migrantët të jenë në përputhje me rregulloret.
Vendet, me flamurin e të cilave lundrojnë anijet e organizatave joqeveritare që shpëtojnë emigrantët, duhet të marrin përgjegjësinë e plotë për ta, thonë ata.
Deklarata pasoi një mosmarrëveshje midis Italisë dhe Francës, e cila kulmoi të premten, kur një anije me 230 emigrantë u ankorua në portin francez të Toulon pasi Italia refuzoi ta lejonte të ankorohej.
“I bëjmë thirrje KE-së dhe Presidencës europiane që të marrin masat e nevojshme për atë diskutim”, thonë përfaqësuesit e katër vendeve. /tesheshi.com/
