Nga Bashkim Kastrati
Lajmi i transmetuar nga disa media se është mbuluar shtatorja e Gjergj Kastriotit – Skënderbeut gjatë faljes së namazit të Kurban Bajramit, shkaktoi reagime të mëdha në opinionin shqiptar, përshirë Kosovën dhe Shqipërinë.
Njerëz të fushave të ndryshme adresuan kritika dhe akuza të shumta për komunitetin mysliman shqiptar në Shqipëri, gjoja për fshehje të qëllimtë dhe tendencë për të fshehur heroin dhe identitetin e shqiptarëve.
Më vonë dolën disa fotografi, që Skënderbeu nuk ka qenë i mbuluar, por në afërsi të tij është vendosur një monitor i madh, përmes të cilit të pranishmit mund të përcillnin më afër ceremoninë e faljes së namazit të Kurban Bajramit.
Menjëherë pas faljes së Kurban Bajramit, ky ekran u madh u hoq, ndërsa debati vazhdoi: a ishte mbuluar apo jo shtatorja e Skënderbeut?
Është e çuditshme se të njëjtit njerëz nuk reaguan kur u mbuluan pikturat e mëdha apo muralet të Skënderbeut në Kuvendin e Kosovës. Ato nuk u mbuluan për disa orë, por në to u vendosën pëlhura të bardha që Skënderbeu të mos shihej.
Mbulimi me pëlhura e heroit kombëtar nuk ju la përshtypje kritikëve të së premtes. Ata nuk u panë të reagojnë në këtë mënyrë. Heshtën. Nuk e thanë asnjë fjalë. Ndoshta arsyeja e heshtjes ishte që kërkesën për vendosjen e pëlhurës mbi Skënderbeun e kishin bërë serbët.
Kujtojmë se me 8 tetor të vitit 2015, këto pëlhura i pati larguar opozita e atëhershme Lëvizja Vetëvendosje, Aleanca për Ardhmërinë e Kosovës dhe NISMA për Kosovën. Këto tri parti opozitare akuzuan kryeparlamentarin Kadri Veseli dhe partitë në pushtet se po e fshehin historinë dhe identitetin e shqiptarëve brenda institucioneve.
Sipas partive opozitare LVV-AAK-NISMA, muralet në Kuvendin e Kosovës, janë pjesë e historisë dhe identitetit të popullit të Kosovës dhe rrjedhimisht edhe pjesë identitare e atij kuvendi. Prandaj, mbulimi sërish i tyre, është një akt i pa precedent dhe është përpjekje për të fshehur një pjesë të historisë dhe të identitetit shqiptar.
Por muralet e zbuluara nga partitë e lartcekura u mbuluan sërish me 12 tetor (2015). Tashmë në vend të tyre, në vend të pëlhurës ato u mbuluan me imazhe tjera me motive që simbolizojnë Kosovën, si Hyjnesha në fron dhe Ujëvara e Mirushës.
Orvatjet e tri partive opozitare mbaruan me kaq, dhe një nga arsyet kryesore ishte se ato nuk u përkrahen sa duhet nga opinioni publik. Nuk u përkrahen sa duhet nga ata që ditëve të fundit hidhnin vrer mbi komunitetin mysliman shqiptar, ndërsa të njëjtëve nuk ju dëgjua zëri kur Skënderbeu u mbulua në institucionet e Kosovës ndoshta përgjithmonë. /tesheshi.com/
