Berisha konfirmoi vetë faktin se është shpallur “non grata” dhe nga Britania e Madhe. Londra zyrtare, me anë të të dërguarit të saj në rajon, tha se dje se po ndjek të njëjtën politikë si ajo amerikane për të goditur lidhjet me korrupsionin të zyrtarëve dhe politikanëve të lartë në Ballkanin Perëndimor, por pa dhënë emra.
Dhe, pikëpyetjeve nëse qe Berisha në listën e zezë angleze u ka dhënë fund vetë ai në një dalje për media.
Jam njoftuar me një letër se Home Secretary ka marrë vendimin për moslejimin e hyrjes sime në MB me arsyetimin:
“Se ju keni lidhje të qarta me grupe të krimit të organizuar dhe kriminelë, të cilët kanë paraqitur një rrezik për sigurinë publike në Shqipëri dhe në MB dhe, se ju jeni i gatshëm t’i përdorni këto lidhje për të avancuar ambiciet tuaja politike, dhe
Për korrupsion dhe pasurimin tim, dhe rretheve të njerëzve pranë meje, ku si shembull përmendet ish këshilltari për zgjedhjet Damir Fazlliç, të cilin sipas vlerësimit të tyre, unë e kam mbrojtur kur, kundër tij kanë dalë prova inkriminuese.
Ndonëse, ashtu si thotë ky vendim është konfidencial dhe, ndonëse përfaqësuesit e MB në Tiranë kane deklaruar se nuk do të publikojne emrat, unë kam marrë vendimin t’a bëj publik për qytetarët shqiptarë, para të cilëve unë kam qenë gjithnjë i vërtetë, me të mirat dhe gabimet, kam luftuar gjithnjë në mbrojtje të interesit të tyre, ashtu siç e kam vlerësuar unë”, tha Berisha.
Më pas, në avokatinë ndaj vetes, përdori të njëjtën tezë konspiracioniste, atë të Soros-it pas ndëshkimit të tij anglo-amerikan.
“Ky vendim është në vazhdën e shpifjeve për interesa të të njëjtit grup që ka sponsorizuar edhe vendimin e Sekretarit Blinken, të bazuar në shpifje dhe lobimin korruptiv të Edi Ramës dhe multimiliardierit George Soros.
Unë kam qenë në dijeni të përpjekjeve të diplomatëve të Departamentit të Shtetit, që partnerët ndërkombëtarë t’i bashkangjiten vendimit të tyre, absolutisht pa asnjë bazë, me qëllim rritjen e presionit ndaj meje dhe justifikimin e vendimit të tyre bazuar në shpifje.
Sikundër ritheksoj edhe një herë, se në momentin e parë që qeveria e MB, ose çdo qeveri tjeter e huaj apo kushdo do të provojë – jo të gënjejë – një provë dhe fakt korrupsioni, unë do të marr çdo vendim ndaj vetes sime”, u arsyetua Berisha. /tesheshi.com/
