Nga Blendi Gashi
Janë bërë dy vjet që nga mbajtja e mbledhjes së parë ndërmjet dy qeverive shqiptare, asaj të Kosovës dhe Shqipërisë.
Me 11 janar 2014, mbledhja u mbajt në qytetin e Prizrenit, dhe nga atje të dy krerët e qeverisë Edi Rama dhe Hashim Thaçi, e cilësuan këtë mbledhje si “takim që shënon kapitull të ri dhe dërgon mesazhin evropian për të gjithë, mesazhin e rajonit me kufi të hapur dhe pa barriera të së kaluarës.”
Ky takim po ashtu u cilësua nga dy kryeministrat si historik i cili ndodhte për herë të parë në historinë e dy shteteve.
Në këtë datë u nënshkrua “deklarata për bashkëpunim dhe partneritet strategjik ndërmjet Republikës së Kosovës dhe Republikës së Shqipërisë”.
Kjo marrëveshje përfshinte fushën e transportit dhe infrastrukturën dhe bashkëpunimin tregtar.
Por, dy vjet pas, marrëveshjet e arritura mes dy vendeve për lehtësimin e tregtisë më tepër mbesin vetëm si foto e marketing, pasi dihet se mosmarrëveshjet doganore sa i përket produkteve tregtare nga Kosova që janë hasur mes dy shteteve.
Së fundmi pengesa kanë pasur eksportuesit kosovarë të rrushit dhe të prodhimeve farmaceutike gjatë eskportit të produketeve në Shqipëri.
Analistët politikë në Kosovë thonë se takimet e tilla nuk duhet të mbesin veç në kornizën e një fotografie por duhet punuar të dyja vendet që të shihen rezultatet që deri më tani nuk janë parë.
Analisti politik Ardian Megjani, thotë për tesheshi.com edhe pse mbledhja e parë mes qeverive shqiptare ishte historike, por takimet e tilla nuk duhet mbeten vetëm në kornizat e një fotografie apo të një dokumenti në sirtar.
“Qeveritë e të dyja vendeve duhet të mbajnë mbledhje të tilla së paku çdo 6 muaj dhe atëherë do të ishin dhe pritshmëritë dhe efektet më të mëdha”, thotë Megjani për tesheshi.com.
Ai thotë se krijimi i një Kuvendi gjithëkombëtar me seli në Tiranë me kompetenca funksionale, këshilldhënëse dhe ekzekutive, do të ishte një gjë e favorshme për shqiptarët në Ballkan.
“Aty do duhej të merrnin pjesë përfaqësuesit e qeverisë së Shqipërisë, Kosovës, përfaqësuesit shqiptar të Maqedonisë, Preshevës dhe Malit të Zi. Aty do duhej të diskutoheshin problemet dhe arritjet politike, ekonomike dhe kulturore të shqiptarëve në këto shtete si dhe përkrahja e vazhdueshme politike, ekonomike dhe kulturore. Kjo mendoj se do të ishte një unifikim i faktorit shqiptar në Ballkan që do ndihmonte përballë çdo sfide dhe problemi të dalin të unifikuar dhe të rritej mirëqenia politike, ekonomike dhe kulturore”, thekson Megjani.
Njohësi i rrethanave politike në vend, Faik Krasniqi thotë për tesheshi.com se mjafton të shikohet shkëmbimi tregtar mes dy vendeve, për të dhënë një vlerësim të saktë rreth bashkëpunimit mes të dyja shteteve shqiptare.
“Ato janë me të vërtetë qesharake. Shqipëria dhe Kosova më shumë bëjnë tregi me shtetet fqinje sesa mes vete. Kjo tregon qartë që takime të cilësuara historike nga Rama dhe Thaçi, kanë qenë takime dhe mbledhje për ta tallur opinionin mbarëshqiptar. Dy shtetet shqiptare, Shqipëria dhe Koosova, respektivisht klasat politike e të dyja shteteve, nuk kanë për interes zhvillimin e dy shteteve shqiptare, por përforcimin e biznesve dhe interesave të tyre, prandaj çdo mbledhje mes dy qeverive shqiptare është vetëm një farsë!”, thotë Krasniqi.
Analisti politik, Blerim Burjani thotë për tesheshi.com se takimet mes qeverive të dy vendeve nuk kanë sjellë ndonjë rezultat të madh dhe dëshmia më e mirë janë mos rritja e investimeve reciproke.
“Bashkëpunimi ka nevojë të thellohet në rrafshin ekonomik pasi realisht nuk vërehet shumë të jetë bërë diçka në këtë aspekt. Andaj, duhet të ketë më shumë përkrahje reciproke në mes dy vende sidomos në shkëmbime të produkteve bujqësore”, thotë ai.
/tesheshi.com/
