Nga Mensur Krasniqi
Është një rastësi deri diku cinike ajo që 9 maji si Dita e Evropës, prej dy vitesh në Maqedoni kujtohet dhe për ngjarjen e kobshme të Lagjes së Trimave në Kumanovë, ku në një përleshje mes trupave policore dhe një grupi të armatosur shqiptarësh, pati me dhjetra viktima, pa llogaritur që pothuajse pjesë e mirë e lagjes u shndërrua në gërmadhë.
Në opinion u ngritën shumë dyshime për këtë rast. Familjarët e pjesëtarëve të grupit të armatosur, politikanë, analistë dhe figura të ndryshme publike aluduan se bëhej fjalë për një skenar të përgatitur nga shërbimet sekrete dhe qeveria e asaj kohe.
Ndërkohë, pjesëtarë të tjerë të grupit të mbetur gjallë, po përballen me akuzat për terrorizëm në Gjykatën Penale në Shkup.
Nga ana tjetër, familjarët e të vrarëve dhe të arrestuarve, akuzojnë edhe figura politike shqiptare, gjeqësisht drejtuesit e lartë dhe vetë kryetarin e BDI-së, Ali Ahmeti, si pjesë të skenarit.
Po si e kujton këtë datë politikologu nga Kumanova, Xhenis Sulimani?! Ai në një deklaratë për portalin tesheshi ka shprehur keqardhje për familjarët e viktimave dhe mungesën e drejtësisë në organet gjyqësore. Sipas tij, vet zvarritja e procedurës gjyqësore dëshmon se bëhet fjalë për montim klasik të rastit në fjalë nga shërbimet sekrete.
“2 vjet nga rasti ‘Kumanova’ janë dy vjet errësirë, për familjarët e viktimave, por edhe për drejtësinë në vend. Ende shumë të panjohura për opinionin, por edhe vet të akuzuarit në këtë rast. Një pjesë e të akuzuarve vazhdojnë të plasojnë dyshime rreth një skenari të shërbimeve, por asnjë qëndrim zyrtar për këtë çështje nga këta të fundit. Janë përmendur edhe persona të politikës, funksionar…, por të njëjtit ende nuk kanë dhënë fjalën e tyre. Stërzgjatja e procesit drejt zbardhjes së rastit forcon bindjen dhe atë që ngrenë edhe vet të akuzuarit se kjo është lojë e shërbimeve sekrete. Diku jashtë mozaikut të politikës, vuajnë qytetarët, vazhdojnë traumat. Çdo lëvizje rutinore e forcave policore ose ushtarake merret si kërcënim, krijon panik. Rasti sa më shpejt duhet të zbardhet dhe drejtësia të shkojë në vend”, tha për tesheshi.com Xhenis Sulimani.
Kujtojmë se si reagim ndaj asaj çfarë ndodhi 2 vjet më parë, pati dhe një protestë të fuqishme shqiptare në Shkup në 1-vjetorin e ngjarjes. Nën thirrjen e Këshillit Opozitar dhe përkrahjen e Lëvizjes BESA, mijra shqiptarë vërshuan në rrugë në përkrahje e solidarizim me të akuzuarit, duke u konsideruar viktima të një skenari djallëzor
Zëdhënësi i BESËS, Orhan Murtezani, tha se ishte pikërisht ajo protestë ku u shënua dhe pika e rrënimit të regjimit VMRO-BDI-së.
“Dita e 9 majit e vitit 2016 do të mbahet mend si dita kur mbi 30000 shqiptarë të Maqedonisë ecën nëpër faqet e historisë duke shfaqur edhe një herë këmbëngulje në vullnetin e tyre për Drejtësi, Dinjitet dhe Demokraci. Do mbahet mend si protesta që e shënoi pikën e rrënimit të regjimit VMRO-BDI, si dita kur u ringjall shpresa se megjithatë edhe për shqiptarët mund të vijnë ditë më të mira. Prandaj, nëse dikush mendon se ka përfunduar e liga dhe ka rënë regjimi , ne u përgjigjemi se “Për neve dhe për shqiptarët akoma jo. Ka rënë vetëm njëra pjesë e regjimit, andaj nuk mund të themi se kemi përfunduar me të pa rënë si i plotë ky regjim antishqiptar, që u la shqiptarëve kaq viktima dhe pasoja që do t’i vuajmë gjatë kohë. Në ditën e Evropës, shqiptarët edhe një herë fuqishëm e përçuan mesazhin se janë garantues i të ardhmes evropiane dhe perëndimore të Maqedonisë, përkundër partisë shqiptare në pushtet e cila bashkë me VMRO-në vendin e shkëputën nga Perëndimi dhe e lidhën me Rusinë”, tha për tesheshi.com Orhan Murtezani. /tesheshi.com/
