Federata Ndërkombëtare e Tenisit e ka pezulluar për dy vite tenisten Maria Sharapova, pasi ajo rezultoi pozitive në testet e dopingut në janar të këtij viti, në turneun Australian Open.
Meldoniumi, që Sharapova do të deklaronte se e merrte që nga viti 2006 për arsye shëndetësore, u bë një substancë e ndaluar në janar të 2016-s. Ajo do të pezullohej përkohësisht në muajin mars.
Vendimi e lë tenisten ruse jashtë Lojërave Olimpike të këtij viti.
Fituesja e pesë Grand Slam-eve, ish-numri një i botës, e tani 29-vjeçare, ka deklaruar se do ta apelojë vendimin.
“Nuk mund ta pranoj një pezullim të padrejtë, të ashpër,” do të shkruante ajo në faqen e saj në Facebook.
“Me vendimin e tyre për një pezullim dyvjeçar, tribunali i ITF-së arriti njëzëri në përfundimin se çfarë kisha bërë nuk ishte e qëllimshme.”
Problemi i përdorimit të substancave të ndaluara është hasur shpesh kohët e fundit te sportistët rusë, duke u kthyer në një problem serioz e të debatueshëm. /tesheshi.com/
