Njëra 12 vjeç e tjetra 14 vjeç, dy muslimanet nuk kanë pranuar të marrin pjesë në mësimet e notit në shkollë për shkak të pranisë së djemve, e për këtë janë pezulluar aplikimet e tyre për pasaporta zviceriane.
Zvicra ua ka hedhur poshtë kërkesat për shtetësi dy vajzave muslimane pikërisht se nuk kanë pranuar të bëhen pjesë e mësimeve të notit në shkollë kur aty janë gjendur dhe djem.
Autoritetet në Bazel thonë se për to nuk do të shqyrtohet mundësia e marrjes së shtetësisë, për shkak se nuk e kanë respektuar programin mësimor në shkollë.
Vajzat, që e kishin bërë kërkesën për shtetësi zviceriane muaj të shkuar, e emri i të cilave nuk bëhet i njohur, kanë deklaruar se feja e tyre nuk i lejon të marrin pjesë në mësime të detyrueshme noti në shkollë kur në pishinë gjenden dhe meshkuj.
“Kush nuk i përmbush këto kushte, shkel ligjin, e prandaj nuk mund të natyralizohet,” i tha në fillim të kësaj jave stacionit televiziv SRF kryetari i komitetit të natyralizimit, Stefan Wehrle.
Babai i dy vajzave, një 40-vjeçar që po ashtu nuk identifikohet, u dënua nga një gjykatë zviceriane dy ditë më parë me një gjobë prej 4.000 frangash zviceriane për të njëjtën arsye, për refuzimin që t’i lërë të bijat të marrin mësime noti në shkollë krah djemve.
Prokuroria kishte kërkuar katër muaj burg për të veç gjobitjes, me pretendimin se ai, një boshnjak, i kishte rezistuar integrimit dhe nuk kishte respekt për legjislacionin zvicerian.
Po ky prind kishte patur dhe më parë probleme me autoritetet, ndërsa kishte kërkuar që vajzat e tij të mbanin mbulesë koke në shkollë. Me argumentin e lirisë fetare, gjykata ia kishte dhënë vajzës më të madhe të drejtën e mbajtjes së mbulesës në institucionet shkollore.
Ky është rasti më i fundit në Zvicër kur autoritetet refuzojnë t’u japin shtetësi aplikuesve për mosrepektim të rregullave vendase. Emigruesit gjenden shpesh mes dilemës së respektimit të normave të besimit të tyre apo të procedurave zviceriane. /tesheshi.com/
