Dhjetë ditë pas humbjes shokuese ndaj Totenhemit, Çelsi u duk i vendosur të nisë një tjetër seri rezultatesh pozitive teksa mposhti pastër në transfertë skuadrën kampione në fuqi të Premier League-s, Lestër Sitin.
Totenhemi do të fitonte këtë pasdite 4-0 ndaj Uest Bromuiçit, e me të njëjtat shifra Arsenali do të mundte Suonsi Sitin në fushë kundërshtare; dy rezultate që ia bënin të detyrueshëm trepikëshin Çelsit.
Një trepikësh që erdhi pas fitores 0-3 ndaj Lestërit. Një fitore që u bë e mundur edhe pse skuadrës londineze i mungonte golashënuesi i saj kryesor, Diego Costa, i lënë pa grumbulluar për shkak të një përplasjeje me stafin teknik.
Protagonistë qenë dy spanjollë, mbrojtësi Marcos Alonso dhe Pedro. I pari shënoi dy herë për Çelsin, në minutën e 6-të dhe të 51-të. Pedro thelloi shifrat 20 minuta pas golit të dytë.
Ekipi pritës, Lestër Siti, e pati të vështirë të përgjigjej, aq sa thuajse munguan tërësisht rastet në portën kundërshtare.
Çelsi kryesues e çoi në shtatë pikë diferencën me Totenhemin e vendit të dytë pas këtyre ndeshjeve të javës së 21-të të kampionatit anglez. Lestëri, në anën tjetër, mbetet në ujëra të turbullta; në vend të 15-të, me 21 pikë, jo shumë larg zonës së rënies një kategori më poshtë. /tesheshi.com/
