Dy sarkofagë plumbi janë zbuluar në Katedralen Notre Dame në Paris, e cila po rindërtohet pas një zjarri shkatërrues në 2019.
Arkeologët francezë kanë konfirmuar se bëhet fjalë për një “zbulim të jashtëzakonshëm”, ka raportuar Guardian.
Sarkofagu i parë përmban eshtrat e një kryeprifti që vdiq në 1710, por njeriu i varrosur në sarkofagun e dytë nuk është identifikuar ende.
Shkencëtarët tregojnë se identiteti i personit të varrosur në sarkofagun e dytë mund të mos përcaktohet kurrë, por në bazë të vlerësimit të ekspertëve bëhet fjalë për një burrë të ri, të pasur dhe të privilegjuar, një fisnik dhe një kalorës që me sa duket ka jetuar në shekullin e 14-të.
Varret u zbuluan në një zonë të përdorur si ruajtje për skulpturat dhe fragmentet e mbulesës origjinale të çatisë së katedrales të shekullit të 13-të, të varrosur nën dysheme në transeptin e kishës, e cila u ndërtua për të ndarë shenjtëroren nga pjesa tjetër e kishës.
Sarkofagët u zbuluan në vendin ku supozohej se do të vendosej skela për të ngritur kullën e re të katedrales dhe shkencëtarët janë të bindur se bëhet fjalë për një zbulim me “rëndësi të jashtëzakonshme shkencore”.
Shtohet se artefaktet në Notre Dame më parë u zbuluan kryesisht rreth 20 centimetra nën dyshemenë e katedrales, por dy sarkofagë plumbi u zbuluan në një thellësi prej një metri. /tesheshi.com/
