Kreu i misionit amerikan për drejtësinë OBDAT, e deklaroi hapur dy ditë më parë, se ajo çfarë do të ndodhë nga shtatori në Shqipëri është instalimi i një “EULEX-i shqiptar” dhe si i tillë duhet leja ligjore e plotë e Parlamentit.
Tashmë është thënë hapur ajo që flitej nën zë dhe që tesheshi.com e ka publikuar një vit më parë.
Por ç’ndodhi? Menjëherë pas kësaj deklarate ka nisur kundërshtimi i hapur i kësaj skeme nga qarqe të politikës, të cilët edhe pse e votuan Reformën në Drejtësi, duan ta relativizojnë atë, apo të ndryshojnë skemën e vendosur nga ndërkombëtarët.
Ish-këshilltari i Ilir Metës, Koço Danaj, i cili në “qeverinë teknike” të vetëshpallur, ishte dizenjuar si ministër i Arsimit, sulmonte hapur kreun e OBDAT-it, duke i thënë se “nuk duam një EULEX si të Salustro-s”, duke iu referuar ish-prokurorit italian në Kosovë që kreu arrestimet e mëdha të ish-krerëve të UÇK-së.
Gjithashtu, edhe deputetë të opozitës, gjatë diskutimit në Komisionin e Posaçëm të Reformës në Drejtësi, kanë kërkuar që të ndryshojnë disa nga nenet e ligjit ku rregullohet prania e ndërkombëtarëve në Shqipëri. Por ata kanë hasur në kundërshtimin e hapur të përfaqësuesit amerikan, i cili ka bërë të ditur se Senati i SHBA-së e ka miratuar tashmë marrëveshjen mes FBI-së dhe qeverisë shqiptare dhe nuk mund të bëjë marrëveshje tjetër.
Realisht, si do të jetë “EULEX-i shqiptar” dhe çfarë ndryshimi ka me misionin e Bashkimit Europian për zbatimin e ligjit në Kosovë apo të ashtuquajturin EULEX?!
Edhe pse të përbashkët kanë veprimin e një misioni të huaj në detyrat e gjyqësorit dhe policisë, këta dy misione ndryshojnë rrënjësisht.
E para dhe më e rëndësishmja është se pjesë thelbësore e “EULEX-it shqiptar” është SHBA, apo thënë më shkoqur, Byroja Federale e Hetimit FBI.
EULEX-i kosovar ishte një mision që kryesisht ndikohej nga burokratët e Brukselit të ngarkuar për Kosovën, kurse në Tiranë do të jenë qeveritë e SHBA-së dhe vendeve kryesore të Bashkimit Europian, posaçërsht Gjermania, që do të kenë fuqi reale, pasi ky mision nuk do të financohet nga paratë e Brukselit, por nga buxhetet e Uashingtonit dhe Berlinit.
Në Kosovë ishin prokurorët ndërkombëtarë që kryenin arrestimet, të shtyra edhe nga dosjet që i furnizonin ministritë e jashtme të vendeve nga vinin apo edhe të shërbimeve sekrete.
Salustro për shembull, i cili ishte italian, u ndikua nga Ministria e Jashtme italiane, vend i cili ka marrëdhënie të privilegjuara me Beogradin, pasi një kompani italiane ka blerë operatorin më të madh telefonik në Serbi.
Forcat italiane të KFOR-it dhe paralelisht shërbimet sekrete, u vendosën pas luftës në Kosovë në zonën e Dukagjinit, ku përdorën bazat dhe infrastrukturën e ish-shërbimit sekret serb.
Si pasojë, dosjet e tyre ishin plot e për plot me faqet e shkruara nga Ministria e Brendshme, Prokuroria dhe Shërbimi Sekret i Beogradit.
Ndërkohë në Shqipëri, qoftë forcat operacionale, qoftë prokurorët, qoftë gjyqtarët do të jenë shqiptarë, të zgjedhur nga e para sipas kritereve fikse, në mënyrë të veçantë për të qenë të imunizuar nga korrupsioni dhe ndërhyrja politike.
Ndikimi i “EULEX-it shqiptar” do të jetë direkt nga agjenci shumë të fuqishme dhe të besueshme si FBI, DEA dhe EUROPOL-i, të cilat kanë bërë gati thuajse pjesën më të madhe të fashikujve me zullumet e mafies shqiptare, lidhjet e saj me politikën dhe politikanëve të korruptuar.
Infrastruktura e madhe është gati, duhet vetëm t’i zbardhin prokurorët e njësisë special SPAK, të cilët do të duhet të firmosin urdhër-arrestet “VIP”.
Ndaj dhe zhurma dhe kundërshtimi ndaj “EULEX-it shqiptar” është kaq i madh.
Dhe do të vazhdojë edhe në ditët e muajt e ardhshëm.
Por duket se tashmë gjithçka është vendosur…
/tesheshi.com/
