Ilir Meta ka zyrtarizuar për herë të parë krizën reale të aleancës ndërmjet tij dhe Edi Ramës, si dhe mundësinë që një qeveri e ndryshme mund të formohet së shpejti.
Por ajo që flitej prej kohësh edhe që është bërë e ditur nga tesheshi.com prej muajsh, pra rrjedha e mundshme e deputetëve të LSI-së drejt PS-së, ka qenë një gjë e paparitur që të pranohet nga kreu i Kuvendit.
Por përveç këtij pranimi, kryetari i LSI-së ka lëshuar një mesazh të koduar drejt Edi Ramës, por edhe ndërkombëtarëve, në lidhje me lëvizjet e mundshme politike.
Në një intervistë për ABC News, Ilir Meta deklaroi se i ka bërë të ditur Edi Ramës që nëse ka 71 vota, ai mund të qeverisë edhe pa LSI-në, madje Meta do t’i japë edhe 3-4 deputetë.
Po kush janë këta deputetë të LSI-së dhe pse Meta është i gatshëm t’i japë Ramës, kur ndërkohë prej disa muajsh po kërkon deputetë brenda PS-së për të gjetur aleatë që të votojnë rrëzimin e Edi Ramës-kryeministër?!
“Ia kam thënë edhe z. Rama, që nëse ke 71 vota, po t’i bëj edhe unë 3-4 vota, nuk ka asnjë problem, siç i kam thënë para një viti, që nëse nuk i pëlqen koalicioni me LSI-në, mund ta bëjë edhe me PD-në, apo me kë të dojë, dhe LSI-ja del në opozitë.
Nuk ka asnjë shqetësim, pra në kuptimin për t’i dhënë një përgjigje gjithë këtyre intrigave, sepse intriga do t’i quaja të gjitha këto”, tha Meta e pyetur nga Mirela Milori.
Vetëm kjo deklaratë tregon se koalicioni ka degraduar dhe ka rënë pre e pazareve, jopolitike por e inercisë pragmatike.
Ndërkaq, në një intervistë të dhënë për revistën MAPO, kreu i LSI-së ka shkuar më larg ku flet për një përpjekje ndërkombëtare shantazhuese ndaj tij.
“Nuk ka asnjë çështje ndaj meje. Të gjitha çështjet kanë qenë politike dhe s’kam pasur asnjëherë shqetësim prej tyre. Gjithmonë kam dhënë shembullin se si mund të përballohen me kurajë qytetare e politike edhe procese të tilla. Jam trajnuar nga zoti Berisha që në vitin 1992, kur isha isha 23 vjeç, si i pari deputet opozitar që m’u hoq imuniteti e që kërcënohesha çdo ditë me burg për të ashtuquajturën kryengritje të Poliçanit. Kështu që mua nuk më shqetësojnë aspak akuzat e çështjet që hapen në emrin tim. Nuk kanë lindur ende në këtë botë burra, vendas apo ndërkombëtarë, që të shantazhojnë Ilir Metën si politikan. Unë përulem vetëm para arsyes, të drejtës e të mirës, në politikë, në jetë e në shoqëri”, deklaroi kreu i Kuvendit..
Pas takimit të tyre në Durrës, Ilir Meta ka dhënë dy mesazhe të forta ndaj Edi Ramës, të cilat janë të koduara, pikërisht për t’i dhënë të kuptojë aleati-kundërshtar se çdo të ndodhë.
Mesazhi i parë është shumë i qartë, që Meta e di që edhe 4 deputetë të LSI-së janë gati t’i bashkohen Ramës, por i përmend atij se kjo do t’i kushtojë rëndë atij.
Nuk ishte i rastiswshm takimi me Meidanin dhe Kokëdhimën, për të cilin Meta thotë jo pa qëllim se “është sekretar i PS-së dhe nuk është i kërkuar as nga Interpoli e as nga Europoli”, duke nënkuptuar Elvis Rroshin.
Pikërisht pas fjalëve të hapura që Rama ka 74 vota, media pranë Metës apo analistë në rrjetet sociale përhapën idenë e Metës-Kryeministër në vitin 2007.
Dhe loja që Meidani dhe Kokëdhima mund të jenë deputetë të LSI-së është një presion i hapur ndaj Ramës.
Meta mbrojti fuqishëm ish-Presidentin dhe sulmoi indirekt Ramën si inspiruesi i sulmeve ndaj Rexhep Meidanit.
Ndërkaq, sulmi i dytë në lidhje me një dosje hetimore ndaj tij ka qenë edhe më i egër dhe u është drejtuar ndërkombëtarëve.
“Nuk kanë lindur ende në këtë botë burra, vendas apo ndërkombëtarë, që të shantazhojnë Ilir Metën si politikan”, është një shprehje e pastër dhe e qartë e një deklarate që parasheh “fundin e botës” për atë që do të guxojë të hapë dosje ndaj tij.
Ky është një shantash i hapur ndaj prokurorëve ndërkombëtar që priten të atashohen pranë Prokurorisë Speciale antikorrupsion… /tesheshi.com/
