Qeveria siriane duhet të përfshihet në dialog politik mes përleshjeve të vazhdueshme me kryengritësit, tha presidenti turk Rexhep Tajip Erdogan gjatë një bisede telefonike me homologun e tij rus Vladimir Putin, tha zyra e Erdoganit.
Erdogan bëri thirrje për “hapësirë për diplomaci në rajon dhe theksoi se regjimi sirian duhet të angazhohet në procesin e një zgjidhjeje politike,” tha zyra e komunikimit e Erdogan në platformën e mediave sociale X.
Turqia do të vazhdojë luftën e saj kundër Partisë së jashtëligjshme të Punëtorëve të Kurdistanit (PKK) dhe “zgjerimeve të saj”, shtoi Erdogan, duke paralajmëruar se “paqëndrueshmëri më e madhe” nuk mund të krijohet në Siri.
Javën e kaluar, një aleancë opozitare filloi një ofensivë të befasishme në veriperëndim të Sirisë dhe mori kontrollin e Aleppos, duke shkaktuar një shpërthim të papritur të luftës civile që ka nisur që nga viti 2011.
Forcat të mbështetura nga Turqia që atëherë kanë pushtuar zona në veriperëndim të vendit.
Rusia është aleati kryesor i presidentit sirian Bashar al-Assad.
Nga ana tjeër, i dërguari i posaçëm i OKB-së për Sirinë, Geir Pedersen, informoi Këshillin e Sigurimit për situatën atje. Sipas tij, zonat e Sirisë si Aleppo, me një popullsi prej më shumë se dy milionë banorë dhe Idlibi tani janë nën kontrollin e aktorëve joshtetërorë. Përparimi vazhdon drejt Hamës, një qytet me rreth një milion banorë.
“Turqia i përshkroi ngjarjet si një përgjigje ndaj shkeljeve të përsëritura të marrëveshjes së Astanës, duke thënë se nuk ishte e përfshirë në konfliktet aktuale. Turqia tha se këto ngjarje tregojnë se Damasku duhet të pajtohet si me popullin e tij ashtu edhe me opozitën siriane. Shtetet e Bashkuara, të cilat kanë forca në terren në Sirinë lindore, thanë se nuk kishin asnjë lidhje me sulmin, duke bërë thirrje për de-përshkallëzimin dhe një proces të besueshëm politik të udhëhequr nga OKB-ja”, tha z. Pedersen.
Sipas z. Pedersen, zhvillimet e fundit kanë shkaktuar reagime të përziera te sirianët. Disa shohin shpresë për ndryshim, të tjerë kanë frikë nga pasojat e grupeve të armatosura që kontrollojnë zonat. Shumë u zhvendosën, ndërsa të tjerë po kthehen në zona të paarritshme prej vitesh. Ka raportime për rikthimin e disa shërbimeve në Aleppo, por edhe shqetësime se si do të funksionojnë strukturat nën kontrollin e aktorëve joshtetërorë.
“Ka indikacione se shumë njerëz të zhvendosur, brenda dhe jashtë Sirisë, po kthehen në shtëpitë e tyre për herë të parë në vite, apo edhe një dekadë. Por po aq dhjetëra mijëra tashmë janë zhvendosur – disa nga sulmet ajrore, disa nga armiqësitë e shtuara dhe disa nga ndryshimet në kontroll. Pas gjithë kësaj qëndron një pasiguri e madhe për të ardhmen e afërt dhe rreziku që mund të pasojnë më shumë gjakderdhje”, tha Pedersen. /tesheshi.com/
