Kampionati spanjoll dhe ai italian mbeten nga të paktët ku fituesi nuk është përcaktuar ende, edhe pse Reali i Madridit dhe Juventusi janë më pranë titullit.
Ndeshjet e së dielës në La Liga, të luajtura të tëra në të njëjtën orë nuk sollën asgjë të re, aq sa dhe fitoret e dy ekipeve kryesuese ishin me të njëjtat shifra.
Reali i Madridit kaloi pengesën më të vështirë që i kishte mbetur në luftën për titull, duke mundur 4-1 Seviljen në “Santiago Bernabeu”.
Një takim i cili do të kishte një nisje të debatueshme, me atë gol të çuditshëm të Nacho-s në minutën e dhjetë. Një gol që do të cilësohej i rregullt si nga gjyqtari në lojë, ashtu dhe nga specialistët e arbitrimit pas ndeshjes.
Ronaldo ishte shënues i dy prej golave, pasuar nga një tjetër i realizuar nga Kroos.
Po 1-4 fitoi Barcelona në fushën e Las Palmasit, me tre gola të Neymar-it dhe një të Suarez-it.
Gjendja në klasifikim mbetet e njëjtë: 87 pikë si për Barcelonën e vendit të parë, ashtu dhe për Realin e vendit të dytë.
Barcelona pret Eibarin të dielën, ndërkohë që Reali i Madridit luan të mërkurën ndeshjen e prapambetur në transfertën ndaj Selta Vigos, e po në transfertë luan të dielën ndaj Malagës.
Në Serinë A, Juventusit i mjaftonte një pikë për t’iu gëzuar titullit të gjashtë radhazi, por do i duhet ta shtyjë festën për më tutje pas humbjes së mbrëmshme në “Olimpico” të Romës, aty ku do të luajë të mërkurën finalen e Kupës së Italisë kundër Lacios.
Roma e kishte detyrim fitoren për t’u kthyer në vend të dytë. Napoli kishte mposhtur 0-5 më herët 
Torinon, duke ia kërcënuar pozitat.
Dhe ajo erdhi për Romën, edhe pse u gjend në humbje ndaj Juventusit që në minutën e 21-të, pas golit të Lemina-së.
De Rossi, El Shaarawy dhe Nainggolan i përmbysën shifrat me golat e tyre, duke sjellë fitoren 3-1 të Romës.
Katër pikë i ndajnë tani Juventusin dhe Romën në kryesim. Massimiliano Allegri e pa humbjen si një thirrje për zgjim për ekipin e tij, që ka mbledhur vetëm dy pikë në tre ndeshjet e fundit të kampionatit, pas dy barazimeve, me Atalantën e Torinon, dhe një humbjeje, këtë ndaj Romës. /tesheshi.com/
