Janë ankoruar këtë fundjavë në portin detar të Durrësit dy fregata të grupit të gatshëm të reagimit të shpejtë të NATO-s – Standing NATO Maritime Group.
Komandanti i njërës prej tyre, Boudeëjn Boots i HNMLS Evertsen F-805, u shpreh i kënaqur për këtë vizitë që, siç tha, forcon më tej marrëdhëniet me Shqipërinë.
“Duhet t’a vizitojmë më shpesh Shqipërinë, qëkur u bë anëtare e NATO-s. Me vjen mirë që jemi këtu bashkë me kolegët tanë shqiptarë dhe jemi gati të bëjmë çfarë është e nevojshme. Ne po bashkëpunojmë me të gjitha vendet anëtare për t’ju përgjigjur në kohë të gjitha detyrave dhe situatave që paraqiten”, tha ai, cituar nga TCH.
Grupi i Anijeve të Gatshme të NATO-s është një forcë ndërkombëtare e përbërë nga anije të vendeve të ndryshme të aleancës që stërviten dhe kryejnë operacione si një grup i vetëm – raporton kjo media.
Përbërja e grupit varion nga kapacitetet detare të ofruara nga vendet kontribuuese në bazë rotacioni. Njëra prej fregatave është holandeze dhe njëra kanadeze. Ato do të qëndrojnë në port nga 18-20 maj dhe vizita e tyre do të mbyllet me stërvitjen Passex. /tesheshi.com/
