Nëse në çerekfinalet e Champions League-s dominojnë ekipet spanjolle, në ato të Europa League-s panorama është më e larmishme.
Në ka dominues në Ligën e Europës, ai është futbolli belg, me dy skuadra në çerekfinale, ndërsa gjashtë të tjerat i përkasin futbollit anglez, holandez, spanjoll, turk, gjerman e francez.
Nga tetë takimet e dyta të një të tetave të kësaj veprimtarie, të luajtura mbrëmë, biletën për në çerekfinale e siguruan Anderlehti e Genku, Mançester Junajtedi, Ajaksi, Selta Vigo, Beshiktashi, Shalke dhe Olimpiku i Lionit.
Ndeshja me më shumë gola qe ajo në Stamboll, ku u ndeshën Beshiktashi dhe Olimpiakosi. Kualifikimi kaloi nëpër disa peripeci për turqit, që për një pjesë të mirë të lojës luajtën me dhjetë lojtarë, e veç kësaj u rrezikuan fort nga grekët. Fati qe me vendasit, që u kualifikuan falë fitores 4-1.
Dramë pati në përballjen e tërë gjermane, në atë mes Borusias së Mynshegladbahut dhe Shalkes. Pas barazimit 1-1 në takimin e parë, pritësit në këtë takim të dytë kryesuan me dy gola pas 45 minutash, por futbollistët e Shalkes arritën të vendosin barazpeshën, e të kualifikoheshin përmes barazimit 2-2.
Në kryeqytetin italian u pa një 90-minutësh tërheqës mes Romës dhe Lionit, i mbyllur 2-1 për vendasit. Një fitore e pamjaftueshme për kualifikimin, ngase francezët i patën mundur 4-2 italianët një javë më parë.
Mançester Junajtedi e siguroi kalimin në çerekfinale me një fitore minimale, 1-0, ndaj Rostovit. Ajaksi i ktheu reston Kopenhagenit, dhe humbjes 2-1 të 9 marsit iu përgjigj me një fitore 2-0, mjaftueshëm për të vijuar më tej.
Selta Vigo mbetet përfaqësuesja e vetme e futbollit spanjoll në Europa League. E bën këtë përmes dy fitoreve në një të tetat ndaj Krasnodarit, 2-1 në fushën e vet dhe 0-2 në transfertën e mbrëmshme.
Anderlehti e mposhti 1-0 në të dy takimet APOEL-in, ndërkohë që Genku i tregua mbrëmë i kursyer ndaj Gentit. Pas fitores së thellë, 2-5, javën e shkuar, përballja e dytë pati për rezultat përfundimtar barazimin 1-1.
Shorti i çerekfinaleve hidhet sot në mesditë për të dy aktivitetet europiane të klubeve. /tesheshi.com/
