Në Gjermani, aty ku dynden të gjithë, njëzet vitet e fundit, numri i njerëzve që punojnë disa punë në të njëjtën kohë është dyfishuar. Më shumë se 3.5 milionë njerëz punojnë në punë të shumta dhe shpesh edhe kjo nuk mjafton që ata të jetojnë një jetë të denjë, shkruan DW.
Këto janë zakonisht punë me aftësi të ulëta ku paguhet vetëm paga minimale e garantuar me ligj, e cila, siç paralajmëron sekretari i përgjithshëm i një sindikate, Philipp Schumann, nuk mjafton aspak:
“Me një pagë të garantuar për orë prej 12 euro dhe një javë pune 42 orëshe, mund të fitoni pak më pak se 2,200 euro bruto. Kjo është vetëm rreth 60% e të ardhurave mesatare në Gjermani dhe jo e mjaftueshme për të jetuar”, shkruan Deutsche Welle.
Në Gjermani është zakon të shprehet paga si një shumë bruto, e cila mund të jetë një surprizë e pakëndshme për të huajt që vijnë për të punuar në këtë vend. Ndodh për shkak se kontributet e pensionit dhe sigurimit shëndetësor, si dhe taksa e kishës dhe tatimi mbi të ardhurat zbriten nga kjo shumë e kjo varet nga shumë faktorë, si statusi martesor dhe numri i fëmijëve. Në total, me 2,200 bruto llogaria mund të “ulet” në rreth 1,500 euro.
Inflacioni hëngri gjithçka
Schumann beson se paga minimale për orë duhet të jetë 17 deri në 18 euro, përndryshe Gjermania kërcënohet nga “mënyra amerikane” ku njerëzit shpesh duhet të punojnë në shumë punë. Në mëngjes dërgoni gazeta, ditën punoni në një shërbim korrier, pasdite në librari dhe në mbrëmje si kamarier…
Në fakt, ishte një hap i madh ngritja e pagës minimale për orë në 12 euro në tetor të vitit të kaluar, por inflacioni dhe rritja e çmimeve “gëlltitën” pothuajse gjithçka që u arrit nga ai vendim politik. Zyrtarisht, pothuajse 17% e popullsisë në Gjermani, pra më shumë se 14 milionë qytetarë, janë të prekur nga varfëria dhe ky numër vazhdon të rritet për shkak të inflacionit. /tesheshi.com/
