Ndërsa refugjatët e luftës dhe diskriminimit në Afrikë e Lindjen e Mesme janë të arsyetuar, azilkërkuesit nga Ballkani nuk kanë argument për të qëndruar në Gjermani dhe në ndonjë shtet tjetër perëndimor. Gjithsesi, ata kanë arsye përderisa marrin rrugën deri në Gjermani, duke shitur edhe shtëpitë në Shqipëri, Kosovë apo vende të tjera të Ballkanit.
Në një analizë, DW thekson se luftë, uri e tortura nuk ka as në Kosovë dhe as në Shqipëri, Serbi, Maqedoni apo Bosnjë dhe Hercegovinë, madje vendet synojnë integrimin në BE.
“Njerëzit duan të shpëtojnë sidomos nga varfëria dhe mungesa e perspektivës, janë të zhgënjyer dhe të desiluzionuar nga stanjacioni politik dhe ekonomik në atdheun e tyre. Dhe për këtë mbajnë në radhë të parë përgjegjësi elitat politike”, shkruan DW.
“Në vendet e Ballkanit Perëndimor papunësia që prej dy dekadash është midis njëzet e pesëdhjetë për qind. Në Bosnjë dhe Hercegovinë më shumë se gjashtëdhjetë për qind e të rinjve janë pa punë. Edhe të rinj të diplomuar e të mirëarsimuar nuk gjejnë punë të përshtatshme, sepse korrupsioni dhe nepotizmi pengojnë mundësitë në tregun e punës. Partitë politike janë shtrirë në shoqëri në mënyre të rrezikshme. Ato janë të paktën në mënyrë indirekte, punëdhënësi më i madh: Se kush bëhet drejtor apo portier, e përcakton partia qeverisëse, pavarësisht nga kualifikimet profesionale të kandidatëve”, bën një panoramë të gjendjes në Ballkan analistja Verica Spasovska.
Analiza e vendeve ballkanike në shkrimin e DW jep një panoramë me fakte për të cilat flitet shpesh në secilin nga vendet e përmendura. Përfundimi: megjithëse në Ballkan nuk ka as luftë, as uri e as torturë edhe dëshpërimi mund të bëhet një diktaturë, prej së cilës dëshiron të amarrësh arratinë. /tesheshi.com/
