Tashmë, që Kosova, Shqipëria e Serbia janë shpallur vende të sigurta të origjinës, njerëzit prej këtyre shteteve që kërkojnë azil në Gjermani nuk kanë asnjë shans për ta fituar atë, ose më saktë kanë 99 për qind shans për t’u refuzuar.
DW raporton se më shumë se 40 për qind e të gjitha kërkesave për azil të paraqitura në Gjermani vijnë nga njerëz nga Ballkani Perëndimor, kryesisht prej emigrantëve nga Kosova, Shqipëria dhe Serbia.
Zyra Federale për Migracion dhe Refugjatë është autoriteti i vetëm, që vendos, nëse këto kërkesa për azil pranohen. Rregullat për këtë i përcakton Konventa e Gjenevës, Kushtetuta dhe ligjet ekzistuese për procedurat e azilit. Ato janë forcuar në Gjermani vitet e fundit.
Më hyrjen në fuqi të statusit vende të sigurta të origjinës për shtetet ballkanike, ku supozohet se nuk ekziston asnjë rrezik i persekutimit politik, apo i dhunës johumane dhe nuk mbizotërojnë rrethana, që të pengonin kthimin e azilkërkuesve në këto vende, aplikuesit për azil do të kthehen pas me shpejtësi.
Edhe Kosova, Shqipëria dhe Mali i Zi, sipas ministrit të Jashtëm, Frank-Walter Steinmeier, është e vështirë të trajtohen si shtete, që persekutojnë shtetasit. “Përveç kësaj këto vende kanë kërkuar vetë në konferencën e Ballkanit Perëndimor në gusht nga qeveria gjermane, që të klasifikohen si vende të sigurta origjine. Arsyeja: me valën e fundit të refugjatëve këto shtete humbasin shumë të rinj, kryesisht për motive ekonomike”, shkruan DW. /tesheshi.com/
