I akuzuar për krime lufte ndaj civilëve boshnjakë dhe kroatë në luftërat që shpërthyen pas shpërbërjes së ish-Jugosllavisë, Dushko Dabetiç u ekstradua mbrëmë nga autoritetet turke.
I lindur në Sarajevë, 46-vjeçari serb arriti mbrëmjen e djeshme në aeroportin e kryeqytetit të Bosnjë-Hercegovinës me një avion të Turkish Airlines, i shoqëruar nga dy policë boshnjakë.
Krimineli serb kërkohej nga Interpoli, dhe në akuzat ndaj tij përfshihen vrasjet, torturat dhe përdhunimet në Grbavica gjatë rrethimit të Sarajevës në mesin e viteve ‘90.
Kërkesa për kërkimin e tij ndërkombëtar dhe arrestimin u lëshua në shtator të vitit 2012 nga një gjykatë e Sarajevës.
I kërkuari serb u ndalua më herët nga autoritetet turke të Interpolit në aeroportin e Antaljas, teksa po lëvizte me identitet të rremë.
Mijëra boshnjakë humbën jetën në luftën e Bosnjës gjatë viteve 1992-1995, e mijëra të tjerë rezultojnë ende të humbur. Vetëm në masakrën ndaj popullsisë boshnjake të Srebrenicës u vranë 8.000 persona, edhe pse zona gjendej nën mbrojtjen e Kombeve të Bashkuara. /tesheshi.com/
