Tjetër hap drejt një Durrësi tjetër, me port të ri, krahas një “qyteti të ri” që do jetë investim emiratas. Zv/kryeministrja Balluku, njëherësh ministre e Infrastrukturës dhe Energjitikës, njoftoi miratimin e marrëveshjes për ndërtimin e Portit të Durrësit.
Sipas saj, investimi do të jetë 2 miliard euro dhe do të punësohen rreth 12 mijë persona.
“Dy miliard euro do të jetë investimi dhe parashikohet punësimi i 10-12 mijë persona. Hedhim një tjetër hap me projektin për Portin e Ri Turistik të Durrësit, investimi më i madh i huaj në rajon, i cili jo vetëm do të transformojë rrënjësisht qytetin e Durrësit, por do ta çojë turizmin në Shqipëri në një tjetër nivel ndërkombëtar.
Miratohet marrëveshja kuadër, ndërmjet Këshillit të Ministrave dhe Eagle Hills Real Estate Development, Albanian Seaports Development Company, sh.a. dhe Nshmi Development L.L.C, për projektin e investimit strategjik ‘Marina & Jahtet e Durrësit’’, njoftoi ajo. /tesheshi.com
