Kreu i SPAK tha së fundi se krimi ka kërcënuar një prokuror, gjë që është shqetësuese për të.
“Krimi i organizuar ka kërcënuar familjen e një prokurori. Më shqetëson kërcënimi nga krimi i organizuar, jo kërcënimi nga politika”, tha ai në takimin e parë të një nisme dialogu mes institucioneve dhe aktorëve të politikbërjes – “IDM Morning Briefing” – organizuar nga Instituti për Demokraci dhe Ndërmjetësim.
“Ne kemi bërë llogari edhe që mos të kthehemi, sepse kjo është detyra jonë të hetojmë. Prokurorët janë imunë, janë të gjithë të përgatitur që t’i përballojnë këto situata, por në fund të fundit e kemi zgjedhur vetë këtë detyrë”, tha Dumani.
Nga ana tjetër, ai pohoi se “ka një rënie prej 40 për qind të kallëzimeve nga institucionet lidhur me korrupsionin”, duke theksuar se “nga tatimet dhe doganat nuk ka asnjë kallëzim për korrupsion”.
“Tatimet zero kallëzime, doganat zero. A ka apo jo korrupsion aty? Vetëm KLSH herë pas here depoziton kallëzime në Prokurorinë e Posaçme, patjetër Policia e Shtetit që po, por detyra e çdo institucioni është të luftojë korrupsionin”, theksoi Dumani, duke shprehur kështu pakënaqësi me këtë tregues.
E megjithatë, ai tha se gjatë vitit 2023 janë regjistruar kallëzime sa për tre vite së bashku.
“Duke qenë të vëmendshëm ndaj raportimeve në medie, kryejmë verifikimet tona dhe nga denoncimet që bëjnë politikanë të ndryshëm në medie kemi regjistruar rreth 67 procedime që i përkasin korrupsionit, abuzimit me prokurimet. Për të qenë të ndërgjegjshëm duhet të bëjmë të gjithë, por ne nuk jemi shkopi magjik që të kontrollojmë çdo gjë. Çdo institucion ka bilbilfryrës, audite, mekanizma dhe nuk referojnë”, theksoi ai.
Për Dumanin, për SPAK është ende vetëm fillimi.
“Pavarësisht se kemi hyrë në vitin e pestë duhet vlerësuar veprimtaria, që do të thotë kemi bërë hetime dhe ngritur akuza ndaj çdo zyrtari pavarësisht pushtetit dhe lidhjeve. Por gjatë katër viteve SPAK ka treguar se ne jemi vetëm në fillimet e punës sonë. Shpresojmë që gjykatat të japin vendime fajësie për akuza të ngarkuara nga ana jonë. Ne kemi patjetër rezultate të suksesshme dhe ky është synimi ynë. Për pesë vitet e ardhshme duhet të besojmë që kemi një institucion të konsoliduar me hetime dhe vendime ndaj të gjitha niveleve. Është e vështirë, por jo e pamundur, por qoftë dhe këto rezultate na stimulojnë dhe na nxisin që të punojmë akoma më shumë”, theksoi ai. /tesheshi.com/
