Sekretarja për Marrëdhëniet me Publikun, Grida Duma, ka akuzuar ditën e sotme Kryeministrin Edi Rama se nuk deklaron në dogana pikturat e tij. Ajo thotë se ky është shteti i të padrejtës dhe se kreu i qeverisë është në krye të shkeljes dhe dhunimit të ligjeve dhe Kushtetutës.
“Kodi Doganor, është një nga ligjet e vendit, që Edi Rama e ka shkelur këto dy vite në mënyrë të përsëritur. Në këto tabela që ju shihni në ekran, janë të gjithë deklarimet për pikturat që kanë kaluar kufijtë e vendit, dhe ka deklarim edhe kur ato janë kthyer”,- tha Duma.
Ajo shtoi se Rama nuk deklaron pikturat që nxjerr jashtë për ti shitur me etiketën e kryeministrit të Shqipërisë. “Edi shkon e vjen në botë me pikturat e tij kryeministrore pa deklaruara asgjë, pa i hyrë ferrë në këmbë. Ligji nuk ka forcë ndaj tij”,- tha Grida Duma./tesheshi.com/
