Kreu i PBDNJ-së, Vangjel Dule ka zbuluar sot publikisht një propozimin, cinik sipas tij, që një ambasador i huaj u ka bërë partive aleate të PD-së.
“Në takimet me diplomatët kryesisht kanë qenë në formën e paraqitjes së argumentave të njohura nga ana e partive të opozitës. Ajo çfarë kam dëgjuar është se ka patur nga ata diplomatë që e njohin po aq sa dhe ne që e jetojmë dhe jemi pjesëtarë të lojës politike në vendin tonë, me ide dhe propozime destruktive. Kam dëgjuar dhe diçka të cilën po ta kisha dëgjuar individualisht nuk do të merrja përgjegjësinë ta thoja publikisht. Fatmirësisht isha dhe me kolegë të tjerë politikanë, ditët e fundit që dëgjova një propozim kaq cinik që nuk e besova se e dëgjova. Na u tha në prani të përfaqësuesve të 4-5 forcave politike që ndoshta mund të ishtë një shans i mirë për ne që të përfitonim nga mospjesëmarrja e Partisë Demokratike në zgjedhje për të marrë ndonjë mandat më tepër. Nëse do të isha “tetë a tetë” me atë bashkëbisedues nuk do të merrja përgjegjësinë ta thoja publikisht, por isha me fat se isha me të tjerë që e dëgjuan. Duhet ta keni të qartë që ka dhe nga këto mendime”- u shpreh Dule, pa e bërë të ditur se për kë ambasador bëhet fjalë.
A mund të jetë Lu? Ai është padyshim më aktivi ndër diplomatët e huaj në Tiranë kur është fjala për një ambasador burrë, nëse Dule ka qenë korrekt me gjininë e tij. Mundet që po, nisur nga fakti se atë që opozita e sheh me bezdi këto kohë, është pikërisht Lu-ja; dhe ku çdo qëndrim të tij e sheh si komplotist.
Dule e bëri këtë deklaratë gjatë një forumi në UET me studentët dhe pedagogët me temë Populizmi vs Reformizmi. Ndër të tjera ai tha se partia e tij e mbështeste kauzën e opozitës për zgjedhjet e 18 qershorit pasi siç tha ai, të gjitha zgjedhjet që janë kryer pas vitit 2013 ka pasur manipulime dhe blerje vote dhe kjo krijon mungesë besimi në procesin e ardhshëm. Dule parashikoi që do të ketë shtyrje të zgjedhjeve parlamentare, por sipas tij, ato do të bëhen brenda këtij viti. /tesheshi.com/
