Vangjel Dules nuk i del inati me Edi Ramën. Në një intervistë në Top Story, kreu i PBDNJ-së e akuzoi kryeministrin se ka shkelur marrëveshjen elektorale me partinë e minoritetit grek duke preferuar Shpëtim Idrizin, që e ka cilësuar si kryetar i një partie “ekstremiste dhe shoviniste”.
Dule ka përmendur se i është bërë ofertë nga Berisha në vitin 2009 që të bënte aleancë me të kur ishte vota e 71 por që nuk pranoi.
“Ftesat ishin bërë publike. Në mënyrë të përsëritur në konferenca shtypi Berisha e drejtoi ftesën e hapur, por në të njëjtën kohë edhe në mënyrë konfidenciale u bisedua që PBDNJ, por me shumë dashamirësi dhe korrektësi e refuzuam për t’u qëndruar atyre parimeve, pavarësisht se mund të cënohen interesat tona të ngushta në një periudhë”, tha Dule.
Ndërkaq, Duke e ka akuzuar Edi Ramën si nacionalist të shtirur ndërsa ishte një kozmopolit.
“Unë nuk fshihem dhe me zotin Rama na dallon edhe diçka tjetër. Nuk e kam iluzionin se duke futur kokën në rërë nuk më shohin të tjerët. Zoti Rama kujton se duke futur kokën në rërë i fshihet realitetit. Kisha një problem si Vangjel Dule, politikan. Nënkryetar i Parlamentit ishte një post që e pranova pa miratimin tim të plotë. Pasi dështoi faza e parë e përfaqësimit në Qeveri, u arrit një marrëveshje me këmbënguljen e Ramës e nivelit të dytë, ku këmbënguli që unë të angazhohesha si nënkryetar i Kuvendit dhe përfaqësimi i PBDNJ do të ishte shumë i gjerë në nivele të tjera politike dhe kjo nuk do të realizohej nëse unë nuk do të pranoja të bëhesha nënkryetar i Kuvendit. Kemi merkaton parlamentare, një deputet që sot zgjidhet me një forcë politike, se ka problem që nesër të kalojë në një forcë politike dhe pasnesër të rikthehet në forcën politike që u zgjodh ose të zgjedhë një forcë tjetër. Zoti Idrizi ka qenë prototipi i këtij tregu. Në 2009 u zgjodh deputet në Partinë Socialiste. E braktisi për të vajtur në një parti që sapo u formua”, tha Dule. /tesheshi.com/
