Nga Blendi Gashi
Ndërsa Kosova bën çmos për të normalizuar marrëdhëniet me Serbinë, qoftë dhe nën diktatin ndërkombëtar, kjo e fundit nuk lë gurë pa lëvizur për të punuar kundër saj, në çdo aspekt, dhe këtë haptazi në sy të ndërkombëtarëve.
Shumë ish-luftëtarë të Ushtrisë Çlirimtare të Kosovës të cilët jetojnë dhe punojnë në shtete të ndryshme. Shpeshherë janë ndaluar pas fletarresteve që ka lështuar shteti serb ndaj tyre.
E ndër këta ish-luftëtarë, ka patur dhe asish politikanë dhe zyrtarë të shtetit.
Një gjë e tillë i ka ndodhur edhe kreut të Aleancës për Ardhmërinë e Kosovës Ramush Haradinajt, në vitin e kaluar i cili gjatë kthimit pas vizitës zyrtare në Berlin, u ndalua në aeroportin e Lubjanës, në Slloveni, në bazë të një fletarresti të lëshuar nga policia e Serbisë në vitin 2006.
Kurse më 11 mars të këtij viti u arrestua në Maqedoni edhe Gafurr Dugolli, drejtor i Zyrës së Protokollit në Ministrinë e Forcës së Sigurisë së Kosovës i cili u mbajt për tetë ditë i arrestuar në burgun Shutka të Shkupit.
Së fundmi, një gjë e tillë u ka ndodhur edhe dy ish-ushtarëve të UÇK-së.
Të enjten dhe të dielën e javës së kaluar, autoritetet zvicerane arrestuan dy kosovarët, Genc Zogaj dhe Albert Spahiu, me arsyetimin se fletarrestet ndaj tyre janë lëshuar nga Serbia.
Sakaq, autoritetet kosovare as që e kanë marrë mundimin gjer më sot që këtij fenomeni t’i thonë “ndal”, së paku duke shfrytëzuar bisedimet e Brukselit, aty ku ulen këmbëkryq me Beogradin zyrtar.
Selimi: Fletarrestet e Serbisë, çështje politike dhe jo ligjore
Ushtruesi i detyrës së ministrit të Punëve të Jashtme, Petrit Selimi ka thënë se çështjet e arrestimeve me fletarreste të lëshuara nga Serbia, janë çështje politike dhe jo ligjore.
Ai ka bërë të ditur se MPJ është në kontakt të përhershëm me autoritetet zvicerane që nga momenti i parë i arrestimeve, dhe se në bashkëpunim me ministrinë e Drejtësisë dhe autoritetet në Zvicër po punojnë për të arritur lirimin e ish-luftëtarëve të UÇK-së.
“Çështja e fletarresteve të lëshuara nga Serbia është çështje politike dhe jo ligjore. Arrestime të tilla po ndodhin çdo vit në vende fqinje si Maqedoni, Mal të Zi apo Slloveni, por edhe në shtete më të largëta si Gjermani, Zvicër apo Kolumbi”, ka thënë Selimi.
Ai ka deklaruar se Ministria e Punëve të Jashtme konsideron se veprimet e tilla të Serbisë janë të papranueshme dhe si të tilla duhet të adresohen në Bruksel gjatë dialogut për normalizim.
A do të bisedohet në Bruksel për fletarrestet e Serbisë?
Pas arrestimeve të fundit të ish-luftëtarëve të UÇK-së me urdhër të Serbisë dhe kërkesës së u.d. të ministrit të jashtëm që kjo çështje duhet të ngrihet në Bruksel, tesheshi.com ka kontaktuar me ministren për dialog Edita Tahiri. Ajo nuk e ka bërë të qartë nëse delegacioni kosovar do të kërkojë që çështja e fletarresteve nga Serbia të shtrohet në tryezën e bisedimeve.
“Pas këtyre ngjarjeve, do ta diskutojmë këtë çështje në qeveri dhe ju komunikojmë rreth vendimit që do të marrim”, ka thënë ministrja Tahiri.
Deputeti Berisha: Qeveria e Kosovës, servile ndaj Beogradit
Që kjo çështje duhet të bisedohet në Bruksel, nuk kanë fare dyshim ish-ushtarë të UÇK-së, tani politikanë të vendit.
Një prej tyre, deputeti Zafir Berisha, i tha tesheshi.com se përderisa vendi ka një qeveri servile ndaj Beogradit, siç është koalicioni PDK-LDK-Lista Serbe, nuk duhet befasuar as me arrestimet që po u ndodhin ish-ushtarëve të UÇK-së pas fletarresteve që po bën Serbia.
“Me Serbinë duhet të diskutohet njohja e pavarësisë së Kosovës, çdo gjë tjetër që diskutohet tregon se shteti ynë është province e Serbisë. Nuk duhet që Kosova të shkoj zvarrë pas temave që ka dëshirë t’i nxjerrë në tavolinën e bisedimeve shteti ser. Kosova duhet të sillet si shtet, nëse është i tillë, ndryshe do të falimenton dhe për këtë do të na dënojë historia”, thotë deputeti Berisha. /tesheshi.com/
