Nga Blendi Gashi
Plotësim-ndryshimi i Ligjit që ka të bëjë me regjistrimin e popullsisë dhe ekonomive familjare në komunat serbe, të cilat s’kanë marrë pjesë në regjistrim në vitin 2011 ka ngjallur debat të ashpër në seancën e fundit plenare ndërmjet deputetëve të partive në koalicion PDK-së dhe LDK-së.
Propozimi i bërë nga deputeti i PDK-së, Zenun Pajaziti, që në rend dite të hyjë kjo pikë ka nxehur jo pak deputeten e LDK-së Melihate Tërmkolli. Kjo e fundit e quajti të panevojshëm plotësimin, ose ndryshimin e ligjit për regjistrimin e popullësisë, me arsyetimin se komunat serbe janë pjesë të territorit të Kosovës, dhe nuk duhet trajtuar ndryshe se komunat tjera të vendit.
“Ato komuna janë në Kosovë dhe nëse janë në Kosovë, ligji ekziston. Nuk e di çka jeni t’u ba. A ka kërku BE –ja. Thirre Zhbogarin këtu dhe diskutojmë sa ligje i bën Sllovenia për regjistrimin popullsisë. Ne e dimë pse nuk janë regjistru qytetarët në atë pjesë të Kosovës. Jemi për regjistrim nga Agjencia e Statistikave të Kosovës me ligjin ekzistues. Ju lutem mos bëni hajgare, janë punë shumë serioze”, tha ajo.
Por, deputeti Pajaziti tha se jo të gjitha çështjet duhet të trajtohen në aspektin patriotik.
“Për me tepër unë nuk dëshiroj të arsyetohem me ato, që z. Termkolli i shtroj. Nuk e di jemi mësu që disa muaj në këtë kuvend me i trajtu njëjtë nga aspekti në thonjëza po i them patriotik të gjitha çështjet që nuk është mirë. Ky projektligj ka të bëjë me një proces, i cili do të realizohet nga institucionet e Republikës së Kosovës, është fjala për një proces që ka mbetur në gjysmë”, tha Pajaziti.
Duke parë mospajtimet e partnerëve të koalicionit për këtë çështje, me kërkesë të shefit të grupit parlamentar të PDK-së Adem Grabovci dhe atij të LDK-së Ismet Beqiri ky projektligj u shty për shqyrtim për javën e ardhshme.
Por, pyetja shtrohet se a duhet ligj i posaçëm për regjistrimin e serbëve të Kosovës?!
Opozota kosovare dhe analistët politik në vend e shohin të panevojshëm që të ndryshohet ligji për regjistrimin e popullësisë, pasi sipas tyre do të krijohej një precedent i rrezikshëm.
Ahmeti Isufi, nënkryetar i AAK-së thotë se ligji për regjistrimin e popullësisë ekziston dhe nuk ka arsye të ndryshohet.
“Ligji ekziston dhe duhet të funksionoj në tërë territorin e Republikës së Kosovës duke mos krijuar ligje të posaqme dhe mekanizma të posaqëm për nacionalitete të ndryshme sepse kjo e deformon edhe funskionin institucional të vendit”, ka thënë Isufi, për tesheshi.com.
Edhe Faik Krasniqi, njohës i rrethanave politike në vend konsideron se është i panevojshëm plotësimi ose ndryshimi i ligjit për regjistrimin e popullsisë dhe ekonomive familjare në komunat serbe, sepse ato komuna janë pjesë të territorit të Kosovës dhe nuk ka nevojë të trajtohen ndryshe.
“Në rast të ndryshimit të këtij ligji, do të krijohej një precedent i rrezikshëm në raportet ndëretnike në Kosovë. Prandaj, duhet t’i jepet fund praktikës së privilegjeve të grupeve të caktuara, e sidomos komunitetit serb që deri më tash kanë përfituar në maksimum nga zemërgjerësia e shumicës shqiptare”, thotë Krasniqi për tesheshi.com.
Kuvendi i Kosovës javën e ardhshme do të diskutoj për ligjin për regjistrimin e popullësisë ku pritet të vendoset nëse do të ndryshohet apo do të mbetet i njëjti.
Ndryshe, procesi i regjistrimi të popullsisë dhe ekonomive familjare në katër komunat e pjesës veriore të Kosovës dështoi në vitin 2011 për shkak se serbët e asaj pjese refuzuan të marrin pjesë në regjistrimin e popullsisë. /tesheshi.com/
