Maqedonasit i degdisin kuqezinjtë në Strumicë, në pikën më fundore juglindore ku ndodhet kufiri me Greqinë dhe Bullgarinë, larg zonës perëndimore të banuar nga Shqiptarët.
Strumica është qyteti i tretë më i rëndësishëm i Maqedonisë që banohet 90% nga etnia maqedonase, e ku realisht banorët e këtij qyteti shquhen për njerëz jo nacionalistë të ndezur por për një kulturë kozmopolite.
Ndeshja me Maqedoninë është më e rëndësishmja pasi ne mund të arrijmë vendin e tretë.
Duke qenë zonë lidhëse me Selanikun, që nga lashtësia Strumica ka qenë si hapësirë ku ngërtheheshin shumë kultura, veçanërisht ajo otomane dhe greke.
Por fakti tjetër i Strumicës është se kryetar bashkie i saj është as më shumë e as më pak por kryeministri i vendit, Zoran Zaev.
Zaev është zgjedhur kryetar bashkie për tre mandate që në vitin 2005.
Edhe në këtë moment Zaev është kryebashkiak dhe zgjedhjet lokale ende nuk janë caktuar. Gjithashtu Strumica është edhe qyteti i kapitenit të Maqedonisë, Goran Pandev, kështu që tifozeria pritet të jetë vetëm maqedonase.
UEFA pranoi kërkesën e bërë nga FFM-ja, duke aprovuar zhvillimin e ndeshjes kualifikuese në stadiumin e Strumicës me 6.500 vende.
Të enjten që kaloi, po në Strumicë, në stadiumin “Mladost” luajti edhe Shkëndija e Tetovës, që fitoi 3-0 përballë Dacia Chisinau në turin e parë kualifikues të Europa League.
Në këtë mënyrë, realizohet ideja dyvjeçare e maqedonasve, që prej hedhjes së shortit dhe pozicionimit në grupin G kualifikues përkrah Shqipërisë, kur mundën të spostonin duelin me kuqezinjtë jashtë Shkupit.
Edhe pse maqedonasit fshihen pas argumentit se,kështu po promovojnë futbollin dhe ekipin përfaqësues edhe në zonat e largëta, vendimi shihet më tepër si një mënyrë për të penalizuar tifozët shqiptarë.
Nëse ndeshja do të luhej normalisht në Shkup, nuk do të kishte dyshime që stadiumi do të mbushej me ngjyrat kuqezi dhe “ballistat” e famshëm do të ndiznin atmosferën. Por, me spostimin në Strumicë, në një krahinë sllave dhe ku nuk ka shqiptarë, maqedonasit synojnë të kufizojnë sa më tepër që të jetë e mundur numrin e mbështetësve për ekipin mik. /tesheshi.com/
