Të dy janë me origjinë hebreje, por që prej dy viteve janë përplasur fort, sidomos pas zgjedhjes së Donald Trump-it.
George Soros dhe Mark Zuckenberg, duket se janë kthyer në “çiftin në luftë” duke eleminuar Donald Trump-in, i cili fitoi me “shiringën” e rrjeteve sociale.
Disa i thonë me një “këmbë në varr”, disa të “mbaruar politkisht|, por 88-vjeçari hungarez me shtetësi amerikane, kambisti spekulant George Soros ka tronditur realisht dy gjigandët e teknologjisë botërore.
Pas sulmit të tij ndaj Facebook dhe Google, ka reaguar menjëherë një zyrtar i lartë i grupit të Zuckenberg-ut.
Samidh Chakrabarti, menaxheri i prodhimit në Facebook ka ndërhyrë në Davos me videokonferencë, duke provuar se disa herë ky rrjet ka ndikuar në lirinë e njerëzve, duke i dhënë kështu të drejtë George Soros-it.
Sipas miliarderit, kompanitë e medias sociale janë kërcënim për shoqërinë, ndërsa paralajmëroi për pasoja të mëdha ndaj Demokracisë.
Facebook dhe Google janë shndërruar në “pengesa ndaj inovacionit” dhe janë një “kërcënim” për shoqërinë. “Ditët e tyre janë të numëruara”, paralajmëroi nga Forumi Ekonomik i Davosit, miliarderi Xhorxh Soros.
“Minierat dhe kompanitë e naftës shfrytëzojnë mjedisin fizik, kompanitë e medias sociale shfrytëzojnë mjedisin social”, tha biznesmeni hungarezo-amerikan, në një fjalim në forumin e Davosit.
“Kjo është veçanërisht zullumqare, pasi kompanitë e medias sociale ndikojnë mënyrën sesi mendojnë njerëzit dhe sesi sillen, madje pa e kuptuar ata vetë. Kjo ka pasoja të gjera e të thella negative në funksionimin e demokracisë, sidomos për integritetin e zgjedhjeve”.
Përveçse shtrembërojnë demokracinë, kompanitë e medias sociale “mashtrojnë përdoruesit e tyre duke manipuluar qëllimet e tyre dhe duke i nxitur drejt “qëllimeve të veta komerciale” dhe “duke projektuar qëllimisht varësinë ndaj shërbimeve që ato ofrojnë”. Kjo e fundit, sipas tij, “mund të jetë shumë e dëmshme, sidomos për adoleshentët”.
“Fuqia për të formësuar qëllimet e njerëzve po përqëndrohet me shpejtësi në duart e pak kompanive. Do të duhet një përpjekje reale për të garantuar dhe mbrojtur atë që Xhon Stjuart Mill e quante ‘liri të mendjes’. Ekziston mundësia që pasi të humbasë kjo liri, njerëzit që do të rriten në epokën dixhitale do të kenë vështirësi për ta rifituar. Kjo mund të ketë pasoja të gjera politike”.
Soros paralajmëroi për një “perspektivë akoma edhe më alarmante” në horizont, nëse kompanitë që kanë akses në të dhëna përmes internetit si Facebook apo Google, të bashkëpunojnë me sistemet e mbikqyrjes të sponsorizuara nga shteti – një trend që tashmë po shfaqet në vende të tilla si Filipinet.
“Kjo mund të rezultojë fare mirë që rrjeti të vendoset nën kontroll autoritarist, pasojat e të cilit as Aldous Huxley apo George Orwell nuk do të mund t’i imagjinonin”, tha ai.
Kompanitë, të cilat ai i përshkroi “si monopolet më të fuqishme ndonjëherë”, nuk kanë gjasa të ndryshojnë qëndrimin e tyre pa vendosjen e rregullave.
“Monopolet e internetit nuk kanë as vullnetin dhe as prirjen të mbrojnë shoqërinë kundër pasojave të veprimeve të tyre. Kjo i kthen ato në një kërcënim dhe u del për detyrë autoriteteve rregullatore të mbrojnë shoqërinë kundër tyre”, tha ai.
Soros tha se Davosi ishte vendi i duhur për të njoftuar: “Ditët e tyre janë të numëruara”.
Ai po ashtu u bëri jehonë fjalëve të shpikësit të rrjetit mbarëbotëror, Sër Tim Berners-Lee kur ai ishte shprehur se gjigandët e teknologjisë ishin shndërruar në “pengesa ndaj inovacionit” që kishte nevojë të rregullohej si shërbim publik.
Gjatë të njëjtit fjalim në Davos, Soros kritikoi lidershipin e Donald Trump, duke thënë se ai e ka vendosur SHBA-në në kursin e një lufte bërthamore me Korenë e Veriut.
Xhorxh Soros është figura më e fundit e profilit të lartë që flet hapur kundër platformave të internetit në Davos. Më herët, ishte shefi ekzekutiv i “Salesforce”, Marc Benioff, që tha se Facebook duhet të rregullohej si një kompani cigaresh, për shkak se krijon varësi dhe është i dëmshëm.
Në nëntor, Roger McNamee, më herët një investitor në Facebook, e përshkroi këtë rrjet social dhe Google-in si kërcënime për shëndetin publik. Në të njëjtën kohë, kryetari themelues i Facebook, Sean Parker, kritikoi rrjetin. “Vetëm Zoti e di se çfarë po u bën trurit të fëmijëve tanë”, tha ai.
Në fakt nuk ka qenë vetëm Soros që ka ndikuar në thyerjen e mitit të rrjeteve sociale.
I pari ka qenë Emanuel Macron, i cili arriti që të neutralizojë rolin e Facebook-ut në zgjedhjet franceze dhe më pas ishte Angela Merkel që i dha një goditje edhe më të fortë në zgjedhjet gjermane .
Ndërkaq, Brukseli zyrtar e ka dëndur me gjoba Zuckemberg-un, siç ka bërë në vitet 2000 me Bill Gatesin.
Përgatiti: Juli Prifti – /tesheshi.com/
