Operatori i aeroportit Dubai International deklaroi këtë të hënë se ai është ende më i ngarkuari në botë për udhëtimet ndërkombëtare, me mbi 78 milionë pasagjerë që fluturuan përmes tij vitin e shkuar.
Mbi 70 milionë pasagjerë do ta përdornin atë në vitin 2014, me një rritje prej 10.7 për qind në 2015-ën.
Rivali kryesor, aeroporti Heathrow i Londrës, do të trajtonte 69.8 milionë pasagjerë ndërkombëtarë në 2015-ën, me një total prej gati 75 milionë pasagjerësh duke përfshirë dhe fluturimet brenda vendit.
Pasagjerët nga India mbajnë rekordin për frekuentimin e aeroportit Dubai International, me gati 10.4 milionë të tillë për 2015-ën, çka flet për një rritje me 17 për qind krahasuar me vitin paraardhës.
Vendin e dytë e zë Mbretëria e Bashkuar, me thuajse 5.7 milionë britanikë që udhëtuan përmes tij vitin e shkuar. Një shifër e rritur me gjashtë për qind krahasuar me 2014-ën.
E në vend të tretë në tregun e pasagjerëve është Arabia Saudite, me 5.46 milionë të tillë që parapëlqyen në 2015-ën të fluturojnë nëpërmjet Dubai International. Një rritje kjo me 12 për qind në krahasim me 2014-ën.
Dhjetori dhe gushti ishin ndër muajt më të ngarkuar, ndërkohë që edhe fluturimet cargo kanë njohur rritje në këtë aeroport.
Aeroporti i dytë i Dubait, Al-Maktoum International, është hapur dy vite më parë, e do të jetë në gjendje të presë 120 milionë pasagjerë në vit me t’u vënë plotësisht në punë. /tesheshi.com/
