Nga Blendi Gashi
Kryeministri Haradinaj ka reaguar pas akuzave që ngritën të mërkurën mbrëma banorët e lagjes “Dardania” në Prishtinë, mbi faktin se ministri i Bujqësisë, serbi Nenad Rikalo i ka keqtrajtuar gjatë luftës së vitit 1999, pra i ka duart me gjak.
Haradinaj ka thënë se në bazë të përgjigjeve që ka marrë nga mekanizmat e shtetit, Prokuroria, Agjencia Kosovare e Intelegjencës dhe policia, rezulton se Rikallo nuk ka qenë i përfshirë në veprime të tilla.
“Si kryeministër i vendit, dua të siguroj qytetarët e Kosovës, se jo vetëm në këtë rast por edhe në çfarëdo situate të ngjashme, do të veproj sipas ligjit dhe përgjegjësive që kam”, thuhet në deklaratën e lëshuar nga zyra e kryeministrit.
Në anën tjetër ka pasur reagime nga partitë opozitare, të cilat kërkojnë që Rikalo të shkarkohet menjëherë dhe Prokuroria të veprojë.
Portali tesheshi.com ka kontaktuar me Prokurorinë e Shtetit, ndërsa zëdhënësja Liridona Kozmaqi ka paralajmëruar hetime ndaj ministrit Rikalo, por nuk ka dhënë detaje se kur mund të nisin ato.
“Ju informoj se Prokuroria Speciale e Republikës deri dje 13.09.2017, kur ka parë lajmet e mbrëmjes në KTV, nuk ka pasur asnjë informacion lidhur me veprimet e mundshme inkriminuese, për Nenad Rikallo, ministër i Bujqësisë në Republikën e Kosovës.
Prokuroria Speciale e Republikës së Kosovës, do të ndërmarrë veprimet e duhura në pajtim me Kodin e Procedurës Penale”, ka thënë Kozmaqi për tesheshi.com.
Opozita: Të hetohet dhe shkarkohet Rikalo
Albulena Haxhiu, deputete e Vetëvendosje-s, thotë se deklarimet e banorëve se janë keqtrajtuar nga ministri Rikalo duhet të jenë dëshmia mbi të cilën do të duhej të hetohej, gjykohej e dënohej ministri i Haradinajt që vjen nga radhët e Listes serbe.
“Qeveria e Haradinajt qëndron në këmbë për shkak të votave të këtyre njerëzve që kanë torturuar në mënyrën më brutale qytetarët tanë gjatë luftës! i bëj thirrje prokurorisë të merret urgjent me këtë rast.
Nuk guxon të heshtet e tejkalohet!”, ka thënë Haxhiu për tesheshi.com.
Kurse deputeti i LDK-së, thotë se po të funksiononte Prokuroria, sot do të merrte në pyetje ministrin Rikallo, i cili është akuzuar për torturim të banorëve prishtinas.
“Po të kishte Prokurori ky shtet, dëshmitë rrënqethëse për tor
turat e Nenad Rikallos – pjesëtar i Beretave të Kuqe gjatë luftës në Kosovë – do të trajtoheshin qysh sot në mëngjes.
Po të kishte qeveri ky shtet, një paramilitar me histori torturuese si kjo, as që do të ishte pjesë e kabinetit të Republikës. Shkarkimi i tij është domosdoshmëri. Pazaret e Lista Srpskas s’mund të cënojnë dinjitetin e viktimave shqiptare. J
anë me dhjetëra qytetarë e dëshmitarë që pretendojnë keqtrajtim brutal të civilëve shqiptarë. Pretendimet e tyre s’kanë për të kaluar në heshtje. Do të bëjmë gjithçka, në Parlament e jashtë tij, për të marrë përgjigjet e duhura. Ftoj Prokurorinë e Kosovës të trajtojë pa vonesë pretendimet në fjalë”, ka shkruar Abdixhiku në Facebook.
“Shteti ka dështuar të ndjekë të dyshuarit për krime lufte”
Fjorda Vllasolli, hulumtuese në Institutin e Kosovës për Drejtësi (IKD) thotë se Prokurori i Shtetit dhe policia në çdo rast kur ka informacione apo indikacione së është kryer një vepër penale duhet të reagojnë, pasi ky është një obligim kushtetutes dhe ligjor.
Sipas saj veçanërisht, Prokuroria duhet të veprojë urgjent në rastet kur dyshohet për krime lufte që kanë ndodhur në Kosovë.
“Reagimi duhet të jetë i bazuar në fakte, dëshmi dhe argumente që vërtetojnë se personat e dyshuar kanë kryer veprat penale krime lufte. Fatkeqësisht, jo vetëm në rastin konkret por edhe në shumë raste tjera që ndërlidhen me krime lufte, prokurori i shtetit dhe vet shteti i Kosovës pothuajse në të gjitha instancat qendrore kanë dështuar për të përmbushur obligimet ligjore. Reagimi i shtetit në këto raste pothuajse bazohet vetëm në vullnet deklarativ për ndjekjen e autorëve të veprave penale për krime lufte, por asesi ky vullnet nuk po zbatohet në praktikë”, thotë Vllasolli për tesheshi.com. /tesheshi.com/
