Manchester Juajtid i ka bërë mirë “druri” që i dha Murinjo lojtarëve, javën e shkuar kur u mundën nga Hadërsfild.
Skuadra e “djajve të kuq” ka mundur një rival direkt për titull, siç është Totenhemi, një prej skuadrave më në formë të javëve të fundit.
Skuadra e Murinjos ka triumfuar 1-0 me gol të shënuar nga “rezerva e luksit”, Antoni Marsial, i cili 10 minuta para fundit të ndeshjes, ndëshkoi ekipin londinez me një diagonale brenda zonës.
Pavarësisht fitores, Murinjo nuk ka qenë krejtësisht i kënaqur me lojën e skuadrës së tij, e shpesh është parë i inatosur me lojtarë të veçantë.
Një javë më parë, pas humbjes së papritur që pësuan, portugezi nuk la llaf pa thënë në adresë të lojtarëve të tij, duke hedhur pardesynë, e duke i bërë “për një lek”, yjet e ekipit.
Por pas kthesës në ndeshjen e së shtunës ndaj Totenhem, Manchester Juajted rimerr vendin e dytë në renditjen e Premier League, dhe është rivali për t’u mundur, nga ekipi tjetër i këtij qyteti, Manchester Siti. /tesheshi.com/
