Një sulm me mjete ajrore pa pilot u krye sot në selinë e flotës ruse në Detin e Zi në Sevastopol, dhe pesë persona u plagosën, tha guvernatori i gadishullit të aneksuar të Krimesë, Mikhail Razvozhaev, raporton AFP.
“Këtë mëngjes, nacionalistët ukrainas vendosën të shkatërrojnë Ditën e Marinës Ruse”, e cila festohet sot në Rusi, shkroi Razvozhaev në Telegram.
Ai tha se droni ka goditur në oborrin e Shtabit të Përgjithshëm të Flotës dhe se në mesin e punonjësve të Shtabit të Përgjithshëm ka pesë të plagosur. Sipas tij, nuk ka të vdekur.
Të gjitha festimet në lidhje me Ditën e Marinës Ruse janë anuluar për arsye sigurie, shtoi Razvozhaev dhe u kërkoi banorëve të Sevastopolit që të mos largohen nga shtëpitë e tyre “nëse është e mundur”.
Ura e shkatërruar
Festimet e mëdha janë planifikuar për festën në të gjithë Rusinë, me një paradë detare në Shën Petersburg që do të mbikëqyret nga presidenti rus Vladimir Putin.
Kjo është hera e parë që autoritetet ruse raportojnë një sulm të tillë që nga fillimi i ofensivës së tyre kundër Ukrainës më 24 shkurt.
Në fillim të ofensivës kundër Ukrainës, Rusia pushtoi pjesën jugore të vendit, rajonin Kherson, i cili ndodhet jo shumë larg Krimesë, e cila u aneksua në 2014.
Në javët e fundit, forcat ukrainase kanë nisur një kundërofensivë në jug për të rifituar territoret e humbura dhe kanë pasur njëfarë suksesi. Të mërkurën, sulmet ukrainase shkatërruan pjesërisht një urë të rëndësishme në Kherson, një qytet i pushtuar nga forcat ruse. /tesheshi.com/
