Dhjetra njerëz po i dhurojnë Ukrainës në luftë dronët e tyre për argëtim dhe hobi, pra drone komercialë, për t’u adaptuar në qëllime ushtarake. Kjo pasi Kievi bëri apel për “dronacione”, d.m.th. donacione dronësh, për të ndihmuar forcat ukrainase të ndërtojnë “ushtrinë e tyre me dron”, raporton BBC. Vendi po kërkon gjithashtu para për të blerë 200 dronë ushtarakë zbulues.
Të dy forcat, ukrainase dhe ruse, deri më tani kanë përdorur drone të vegjël komercialë, ose mjete ajrore pa pilot (UAV) në luftë. Por Justin Bronk nga instituti britanik i mbrojtjes dhe sigurisë RUSI paralajmëron se ndërsa dronët e vegjël janë të dobishëm, taktikat në fushën e betejës po përshtaten për t’iu kundërvënë atyre.
Dronët e vegjël dhe komercialë mund të ofrojnë pasqyrë dhe pamje të drejtpërdrejtë të pozicioneve të armikut, thotë Bronk. “Të dyja palët në Ukrainë ishin në gjendje ta përdornin imazhe video në kohë reale shumë shpejt, të reduktonin zjarrin e artilerisë dhe ta drejtonin shpejt saktë për të qenë shumë efektiv, edhe kur përdoret artileri e padrejtuar të prodhimit të vjetër kundër forcave armike.”
“Ushtria me dron” e propozuar është një program kompleks që përfshin prokurimin, mirëmbajtjen dhe zëvendësimin, si dhe trajnimin e pilotëve, sipas Kievit. “Ushtria e mjeteve ajrore pa pilot do të na lejojë të monitorojmë vazhdimisht vijën e frontit prej 2470 kilometrash dhe t’i përgjigjemi efektivisht sulmeve të armikut, duke përdorur teknologjinë moderne,” tha koloneli Oleksiy Noskov, Zëvendës Komandanti i Përgjithshëm i Forcave të Armatosura të Ukrainës.
Mykhailo Fedorov, ministri i transformimit dixhital të Ukrainës, i tha BBC-së përmes e-mailit se qëllimi i parë i fushatës është blerja e dronëve taktikë që kanë një rreze veprimi prej 100 miljesh dhe janë të pajisur me kamera të sofistikuara, GPS dhe pajisje hartografike. Megjithatë, pas studimit të çështjes, ai thekson se “ekipi ynë e kuptoi se ushtria ukrainase ka ende nevojë për kuadrokopterë”, kështu që ai thotë se vendi po u bën thirrje njerëzve që “të dhurojnë dronët e tyre”. /tesheshi.com/
