Të dielën në prag të Krishtlindjes, Papa Françesku shprehu keqardhjen e tij që mesazhi i paqes i Jezusit po hesht nga “logjika e kotë e luftës” pikërisht në vendin ku lindi ai.
Duke festuar Krishtlindjet e 11-të të Papës së tij, Françesku drejtoi një meshë solemne në prag të Krishtlindjeve në Bazilikën e Shën Pjetrit, ku në predikimin e tij foli për konfliktin në Tokën e Shenjtë.
“Sonte, zemrat tona janë në Betlehem, ku princi i paqes është refuzuar sërish nga logjika e kotë e luftës, me një përplasje të armatosur që edhe sot e pengon atë të gjejë një vend në botë”, tha Françesku, gjithsesi duke mos guxuar të përmendë Izraelin si agresor dhe përgjakës i Tokës së Shenjtë.
Kreu 86-vjeçar i Kishës Katolike foli disa orë pasi kryeministri izraelit Benjamin Netanyahu u zotua të shkonte më thellë në Rripin e Gazës pasi 15 ushtarë izraelitë u vranë në fundjavë.
Ministrja palestineze e Turizmit Rula Ma’ayah tha në qytetin ku lindi Jezusi: “Bethlehemi po feston Krishtlindjet me trishtim dhe pikëllim për shkak të asaj që po ndodh në Gaza dhe në të gjithë Bregun Perëndimor, në të gjitha territoret palestineze.”
Në meshën papale për 6500 persona në bazilikën e Shën Pjetrit, Françesku tha se mesazhi i vërtetë i Krishtlindjes është paqja dhe dashuria, duke u bërë thirrje njerëzve që të mos jenë të fiksuar pas suksesit të kësaj bote dhe “idhujtarinë e konsumizmit”.
Ai foli për “një karakteristikë tepër njerëzore që kalon nëpër histori: ndjekja e fuqisë dhe forcës së kësaj bote, shkëlqimit dhe lavdisë, e cila mat gjithçka me sukses, rezultate, numra dhe shuma, një botë shumë e fiksuar pas arritjeve”.
Papa tha se megjithëse është e vështirë për shumë njerëz të festojnë Krishtlindjet në “këtë botë që është kaq gjykuese dhe e pamëshirshme”, ata duhet të kujtojnë atë që ndodhi në Krishtlindjen e parë.
“Sonte dashuria ndryshon historinë”, tha ai. /tesheshi.com/
