“Drogë” te fëmijët, protesta prindërore në Tajvan

Reagim ndaj mësuesve dhe mjekëve për preparate qetësuese në kopshte

Shqetësimi dhe zemërimi i prindërve është ndezur në Tajvan nga hetimet e autoriteteve për administrimin e qetësuesve për fëmijët parashkollorë.

Në shënjestër janë mësuesit e kopshteve në New Taipei City, të cilët u jepnin fëmijëve shurupe kundër kollës që përmbajnë substanca të tilla si fenobarbital dhe benzodiazepina, të cilat shkaktojnë varësi.

Policia, e cila ka hetuar këtë çështje prej javësh, thotë se është e paqartë pse fëmijëve iu dha droga.

Ndërkohë, një rast i ngjashëm doli në dritë në qytetin Kaohsiung të hënën. Atje, katër mjekë u shpallën fajtorë për keqpërdorim dhe përdorim të parregullt të fenobarbitalit për rreth 20 fëmijë. Atyre iu pezulluan licencat për gjashtë muaj dhe u gjobitën.

Rastet kanë ngjallur protesta nga familjet që bëjnë thirrje për më shumë transparencë nga policia, ndërsa të tjerët kritikojnë qeverinë.

Në të njëjtën kohë, spitali i Taipeit filloi gjithashtu të ofrojë teste gjaku falas për fëmijët parashkollorë për të kontrolluar gjurmët e qetësuesve në gjakun e tyre.

Skandali doli në dritë në maj kur prindërit në një kopsht privat në New Taipei City akuzuan stafin se u jepnin fëmijëve të tyre “droga të panjohura”. Një baba, raporton BBC, vuri re se fëmija i tij kishte ca simptoma gjatë festës së Vitit të Ri Kinez në shkurt.

Më shumë ankesa u bënë në muajt në vijim, dhe në qershor autoritetet nisën një hetim dhe gjetën të paktën tetë fëmijë me gjurmë të fenobarbitalit dhe benzodiazepines.

Javën e kaluar çerdhja në fjalë u mbyll dhe drejtori, si dhe pesë anëtarë të stafit u arrestuan. Hetimi penal është në vazhdim.

Nga ana tjetër, stafi deklaroi se prindërit kishin rënë dakord për një listë të medikamenteve të ofruara nga shkolla.

Ilaçet që përmbajnë fenobarbital përdoren kryesisht për trajtimin e epilepsisë ose përdoren si anestetikë dhe janë të vështira për t’u gjetur. Benzodiazepinat përdoren zakonisht për të trajtuar ankthin. Të dyja substancat janë shumë të varura dhe mbidoza mund të çojë në përgjumje dhe gulçim. /tesheshi.com/