Nga Blendi Gashi
Pas kërkesës së opozitës në Shqipëri për një test droge që duhet të bëjnë deputetët, vjen së fundi dhe kërkesa për test alkoli që duhet të bëjnë kolegët e tyre në Kosovë. Kjo, pas një episodi të Haradinajt duke rrëkëllyer ca gllënka raki, e madje duke qerasur dhe sa “shokë armësh” të opozitës në parlamentin kosovar. Dhe më pas ishte kryeministri Thaçi ai i cili kërkoi t`u futej tubi i policit deputetëve – veçanërisht atyre të opozitës – me aludimin e pastër se po vijnë të dehur e po bëjnë veprime prej të dehurisht në parlament.
“Duhet të dihet në çfarë gjendje futen deputetët brenda në Kuvendin e Kosovës”. Më i rrezikshëm është një deputet i dehur se një shofer i dehur sepse një deputet i dehur merr në qafë një popull me veprimet e veta”, ka deklaruar Thaçi në një emision televiziv.
Këtë ide e ka përkrahur edhe partia që kritikon më së shumti Thaçin, lëvizja ‘Vetëvendosje’, por me kusht që të bëhet edhe testi i kokainës. Kjo kërkesë është shtruar nga deputeti Fisnik Ismaili.
“Hashë, mbasi u deklarove që duhet me i testue deputetët se a janë nën influencën e alkoolit, po m’intereson se a kishe pranue ti me do dosta me iu nënshtrue edhe testit të kokainës, tash që u çel ky muhabet?”, ka shkruar Ismaili në Facebook.
Edhe kryeparlamentari Kadri Veseli, pas mbledhjes së Kryesisë të mbajtur sot ka thënë se ka dyshime se të premten me 23 tetor, deputetët nga opozita kanë qenë të droguar dhe të dehur.
“Deri tani në Kuvend janë përdorur vezë, gaz lotsjellës, gjësende të forta, fyerje ujë në të njëjtën kohë ka dyshime se ka ndikim edhe të alkoolit dhe drogës. Të gjitha këto janë që i keni dëgjuar edhe vetë. Është një gjendje që i ka shqetësuar deputetët”, ka deklaruar Veseli.
Por, a duhet të bëhet vërtet një test alkooli për deputetët?
Analisti Ali Hertica, mendon se është e nevojshme të bëhet testi për alkool për deputetët pasi ata marrin vendime të rëndësishme për popullin dhe duhet të kenë kontroll për veprimet e tyre.
“Me gjestet e tilla deputetët tanë japin një pasqyrë të keqe edhe Kosovës edhe vet rinisë, sepse këta të fundit mund ta përdorin alkoolin edhe në shkolla e fakultete . Këto dukuri negative duhet të eleminohen nga ligjvënësit. Besoj se edhe sovrani do tu jap dënimin në zgjedhje dhe do t’i zgjedh jo alkoolistët, por njerëzit dhe intelektualët e mirfilltë”, ka deklaruar Hertica, për tesheshi.com.
Njohësi i rrethanave politike në vend, Astrit Gashi në mënyrë ironike ka thënë se rinia tani duhet të nis të dalë në Kuvend.
“Raki ka, muzikë e këngëtare LIVE ka poashtu. Plus bufeja afër- për naj burek në fund. Gazi i botës – me humore bëhet apo?”, ka shkruar Gashi në Facebook.
Mbetet të shihet nëse do të realizohet kërkesa e Thaçit, apo e gjitha do të mbetet vetëm në kuadrin e një thirrjeje publike që nuk do të jetësohet. /tesheshi.com/
