Kryeministri Edi Rama i është falur sërish shifrave të Guarda Di Finanza-s për të kundërshtuar akuzat dhe bindejen kolektive tashmë për drogën që po bën kërdinë kudo nëpër Shqipëri. Madje në komunikimin javor përmes faqes së tij në Facebook, Rama tha qeveria e tij ka realizuar arritjen më të madhe në luftën kundër drogës, referuar gjithnjë raportit të Guardia Di Finanza-s.
“Avioni fotografik ka përfunduar misionin e tij. Këtë vit u kryen më shumë se asnjëherë tjetër numër fluturimesh. U regjistrua një shifër rekord në këto tre vite e rezultatit, 99.8% e parcelave të zbuluara u shkatërrua. Nuk e them unë apo Ministria e Brendshme, e raporton Guardia Di Finanza, një trup e njohur botërisht për profesionalizmin dhe integritetin e saj në luftën kundër krimit të sofistikuar. Edhe këtë vit e fitoi luftën dhe shifrat thonë se këtë vit luftën e fitoi më shumë se kurrë Policia e Shtetit. Kjo luftë u fitua me shifra dhe jo me kazanët e mbetjeve dhe baltës ndaj Policisë”, tha Rama.
Sipas tij, ndryshimi është se katër vjet më parë Guardia di Finanza nuk lejohej të futej dhe jo më të bashkëpunonte me autoritetet policore vendase në luftën kundër drogës.
“Ndërsa tani, lufta ndaj mbjelljes së kanabisit është në rend të ditës dhe po u tregojmë qytetarëve se ky biznes nuk mund të lejohet më, prandaj qentë le të lehin, karvani ecën përpara”, përfundoi shefi i qeverisë shqiptare komentin e tij mbi fenomenin “drogë e mbjellë gjithandej” nën qeverisjen e tij. /tesheshi.com/
