Kryeprokurori Adriatik Llalla dje se do të hetohet çdo rast kur asgjësimi i drogës është bërë pa praninë e prokurorisë. Lazarati ka qenë përplasja e madhe mes ish-ministrit Tahiri dhe prokurorisë, që kur Didi u bëri thirrje kolgëve të organit të akuzës që të ishin të pranishëm në operacionet e kapjes dhe asgjesimit, pra pikërisht atë që kërkon Llalla sot. Por mos ky i fundit do të godasë gjetiu me ankesën e tij?
Droga është kryefjala mbi të cilën ka ngritur protestën opozita e sotshme. Ajo akuzon se droga e madhe e mbjellë në vend është e mbështetur nga instanca shtetërore, kryesisht policia. Ish-ministri i Rendit Saimir Tahiri, më i akuzuari i opozitës dhe i partisë kryesore në qeverisje, LSI, u shkarkua një muaj më parë. Gjatë punës së tij gati 4-vjeçare Tahiri besoi se do të mbahej mend si ministri që shkatërroi ishullin e hashashit në Shqipëri, Lazaratin, por në fakt ai po kujtohet për Shqipërinë e kthyer në një Lazarat të madh, ku kapen çdo ditë tonelata më hashash. Mesa duket pikërisht Lazarati do të kthehet dhe në makthin e tij. Burime nga Prokuroria e Përgjithshme, në krye të së cilës ndodhet një kryeprokuror i zgjedhur nga PD e LSI, thanë për tesheshi.com se policia e drejtuar nga Tahiri po akuzohet për parregullsi në mënyrën e asgjësimit të drogës në Lazarat. Këtë hetim që mund të shkojë deri tek emri i Tahirit e paralajmëroi kryeprokurori Llalla, por pa përmendur rastin në fjalë.
“Në mënyrë të vazhdueshme bëjnë publike të dhëna se çdo ditë sekuestrohen sasi të konsiderueshme lëndësh narkotike, asgjësohen lëndë narkotike, ndërsa nga ana tjetër thuajse ka një mospërfshirje totale të prokurorëve në mënyrën sesi administrohen, sekuestrohet dhe asgjësohen këto lëndë narkotike. Është detyrim ligjor i gjithsecilit prej nesh të verifikojë këto rastet, për të parë, verifikuar dhe vendosur para përgjegjësisë ligjore kur konstatohet se lënda narkotike dhe provat e tjera materiale asgjësohen në mënyrë jo të parashikuar nga ligji. Në të gjitha rastet, lënda narkotike ashtu si çdo provë tjetër do të asgjësohet në prani të Prokurorit. Ju rikërkoj që të gjitha rastet kur ka dyshime që provat materiale asgjëson në mënyrë të kundraligjshme të fillojnë hetimet nëse kjo lëndë narkotike apo çdo lëndë tjetër, provë materiale nuk asgjësohet ose administrohet në mënyrën e parashikuar në ligj të fillojnë hetimet dhe të vendosen para përgjegjësisë ligjore autorët”, tha ai.
Por rasti i Lazaratit tregon se ka pasur një mospërfshirje me dashje ose në rastin më të vogël një neglizhencë nga ana e vetë Prokurorisë.
Drejtori i Përgjithshëm i Policisë së Shtetit në atëkohë, Artan Didi, bëri një deklaratë të fortë publike ku tha se policia nuk kishte mbështetjen e Prokurorisë në punën e saj.
Ja çfarë thoshte Didi në atë kohë: “Jemi në një moment kritik që lidhet me mbështetjen e policisë nga institucionet e tjera të drejtësisë siç është Prokuroria e cila vazhdon me të njëjtin ritëm pune, me prokurorë të gatshëm dhe një prokuror që na ka ardhur para dy ditësh dhe tani nuk e dijmë ku është, nga Krimet e Rënda. Kur gjithe policia është në këmbë, imagjinoni në këtë zonë të mbushur me aktivitet kriminal, me prova materiale që lidhen me krimin, me armë, granatahedhësa, mortaja, predha, mitrolozë, bimë narkotike, bimë narkotike që janë aty me kohë të paketuara, me bimë nëpër bahçe dhe kur vjen puna policia ka mbetur vetëm. Ecuria e operacionit lidhet shumë me veprimet proceduriale që i mbulon Prokuroria. Bëj thirrje që institucionet e drejtësisë duhet të jenë këtu për të provuar dhe vërtetuar se çfarë ka ndodhur në Lazarat, se çfarë vlerash monetare janë prodhuar në këtë vend. Se ku kanë shkuar ato, më pas duhet ta hetojë Prokuroria”.
E tani Llalla kërkon pikërisht të njëjtën gjë që ia ka kërkuar policia pak vite më parë. Ç’po ndodh? Duket se hija e Saimir Tahirit endet sërish mes Prokurorisë dhe LSI-së. /tesheshi.com/
